ఏ నాగరిక సమాజంలోనూ హింసను కీర్తించరు

కెనడాను ఉద్దేశించి భారత్‌ వ్యాఖ్య

దిల్లీ: కెనాడాలోని ఒంటారియోలో నిర్వహించిన ఊరేగింపులో ఖలిస్థానీ అనుకూల ప్రదర్శనలపై భారత్‌ తీవ్ర నిరసన తెలిపింది. హింసను కీర్తించడం ఏ నాగరిక సమాజంలోనూ భాగం కాదని పేర్కొంది. నేర, వేర్పాటువాద శక్తులకు కెనడాలో సురక్షితమైన ఆశ్రయం కల్పించడాన్ని మానుకోవాలని పిలుపునిచ్చింది. ఈ మేరకు భారత విదేశీ వ్యవహారాల శాఖ అధికారప్రతినిధి రణధీర్‌ జైశ్వాల్‌ మంగళవారమిక్కడ మాట్లాడారు. కెనడాలోని తన దౌత్య ప్రతినిధుల భద్రతపై భారత్‌ ఇప్పటికీ ఆందోళనగా ఉందన్నారు. ఎలాంటి భయాందోళనలకు గురి కాకుండా బాధ్యతలను నెరవేర్చుతామని కెనడా హామీ ఇస్తుందని భావిస్తున్నట్లు పేర్కొన్నారు.