రూ.8 వేలు ఉన్నాయి.. ఐదేళ్ల వరకు రాను: తండ్రికి మెసేజ్‌ పంపి విద్యార్థి అదృశ్యం

కోటా: విద్యార్థుల వరుస ఆత్మహత్యలతో వార్తల్లో నిలుస్తోన్న రాజస్థాన్‌లోని కోటాలో మరో ఘటన చోటుచేసుకుంది. నీట్‌ శిక్షణ కోసం వచ్చిన ఓ విద్యార్థి అదృశ్యమయ్యాడు. అంతకుముందు విద్యార్థి పంపిన సందేశంతో అతడి తల్లిదండ్రులు ఆందోళనకు గురవుతున్నారు. రాజస్థాన్‌లోని బమన్‌వాస్‌ ప్రాంతానికి చెందిన రాజేంద్ర మీనా నుంచి అతడి తండ్రి జగ్‌దీశ్‌ మీనాకు ఓ సందేశం వచ్చింది. ‘‘నేను ఇంటికి రాను.. వెళ్లిపోతున్నాను. ఉన్నత చదువులు చదవాలని లేదు. నావద్ద రూ.8వేలు ఉన్నాయి. ఐదు సంవత్సరాల వరకు తిరిగిరాను. నా ఫోన్‌ అమ్మేస్తాను. నేను ఎలాంటి తప్పుడు నిర్ణయాలు తీసుకోను. నా గురించి బాధపడొద్దని అమ్మకు చెప్పండి. నా దగ్గర మీ అందరి ఫోన్‌ నంబర్లు ఉన్నాయి. ఏడాదికి ఒకసారి తప్పకుండా ఫోన్‌ చేస్తాను’’ అని అందులో ఉంది. దీంతో ఆందోళన చెందిన జగదీశ్‌ పోలీసులకు ఫిర్యాదు చేశారు. ఈ నెల ఆరో తేదీ నుంచి అతడు కనిపించడం లేదని, ఆ రోజు మధ్యాహ్నం కోటాలోని వసతిగృహం నుంచి వెళ్లిపోయాడని తెలిపారు. ప్రస్తుతం పోలీసులు ఆ విద్యార్థి కోసం గాలిస్తున్నారు. గత ఆదివారం దేశవ్యాప్తంగా నీట్‌ పరీక్ష జరిగిన సంగతి తెలిసిందే.