మా వాడు అమాయకుడు..

ఎర్రకోట వద్ద స్తంభం ఎక్కిన యువకుడి కుటుంబ సభ్యుల వెల్లడి

తరన్‌ తారన్‌: దిల్లీలోని ఎర్రకోట వద్ద మంగళవారం సిక్కు మత జెండా(నిషాన్‌ సాహిబ్‌) ఎగురువేయడంలో ఇతరత్రా దురుద్దేశాలు ఏమీ లేవని ఆ ఘటనలో చురుకైన పాత్ర నిర్వహించిన యువకుడి కుటుంబ సభ్యులు తెలిపారు. పంజాబ్‌లోని తరన్‌ తారన్‌కు చెందిన జుగ్రాజ్‌.. రైతు గణతంత్ర కవాతులో పాల్గొనేందుకు కొందరు రైతులతో కలిసి దిల్లీ వెళ్లాడని అతని తాత మెహల్‌ సింగ్‌ వెల్లడించారు. ఎర్రకోట వద్దకు చేరిన సమూహంలోని వ్యక్తులు  అక్కడ ఉన్న స్తంభం ఎక్కలేకపోవడంతో వారి సూచన మేరకు జుగ్రాజ్‌ పాకుతూ స్తంభం శిఖరానికి చేరుకున్నాడని పేర్కొన్నారు. ‘జుగ్రాజ్‌ అమాయకుడు. వాడికి ఇతర దురుద్దేశాలు ఏమీ లేవు’ అని తెలిపారు. పోలీసులు వచ్చి అరెస్టు చేస్తారేమోనన్న భయాన్ని మెహల్‌ సింగ్‌ వ్యక్తం చేశారు. జుగ్రాజ్‌ తండ్రి బల్‌దేవ్‌ సింగ్‌కు మూడు ఎకరాల పొలం ఉంది. మొత్తం నలుగురు సంతానం.