వైభవంగా లేగదూడకు నామకరణ వేడుక

భోపాల్‌: శిశువులకు 21వ రోజున నామకరణ వేడుక చేసి పేరు పెట్టడం చూశాం. మధ్యప్రదేశ్‌లోని ఖండ్వాకు చెందిన ఓ కుటుంబం మాత్రం వినూత్నంగా లేగదూడకు వైభవంగా నామకరణ వేడుక నిర్వహించి పేరు పెట్టింది. ఆవు దూడ పుట్టిన ఆరో రోజున ఈ వేడుక చేసింది. బంధుమిత్రులు, గ్రామస్థుల సమక్షంలో.. సంప్రదాయ పద్ధతిలో వేడుక నిర్వహించి లేగదూడకు పేరు పెట్టారు. పుట్టిన సమయాన్ని బట్టి దూడకు ‘జమున’గా పేరు నిర్ణయించారు పండితుడు. వేడుకకు హాజరైన బంధువులు నృత్యాలు చేస్తూ ఆనందంగా గడిపారు. ఖండ్వాలోని కిన్నర్‌ సమాజానికి చెందిన సీతారాజాన్‌ అనే ట్రాన్స్‌వుమెన్‌ కైలాశ్‌ అనే వ్యక్తిని 16 ఏళ్ల క్రితం పెళ్లి చేసుకున్నారు. తాను పిల్లలను కనలేనని, తన ఇంట్లోని ఆవునే సొంత కుమార్తెలా చూసుకుంటున్నట్లు ఈ సందర్భంగా సీతారాజన్‌ చెప్పారు. నామకరణ కార్యక్రమంలో ఖండ్వా ఎమ్మెల్యే దేవేంద్ర వర్మ సైతం పాల్గొనడం విశేషం.