Suspend: మీసం పెంచినందుకు కానిస్టేబుల్‌పై వేటు.. ఎక్కడంటే!

మధ్యప్రదేశ్‌లోని భోపాల్‌లో రాకేశ్‌ రాణా అనే పోలీసు కానిస్టేబుల్‌ను అధికారులు సస్పెండ్‌ చేశారు. సింహా సినిమాలో బాలకృష్ణ తరహాలో మీసం పెంచుకోవడమే ఇందుకు కారణం. రాణా మెడ వరకు మీసాలు, జుత్తుతో విధులు హాజరయ్యారని, వాటిని కత్తిరించుకోమని చెప్పినప్పటికీ వినకపోవడం వల్ల వేటు పడిందని ఏఐజీ ప్రశాంత్‌ శర్మ తెలిపారు. యూనిఫాం వేసుకున్న ఏ వ్యక్తీ అటువంటి వేషధారణతో విధులకు హాజరు కారాదని స్పష్టం చేశారు. మరోవైపు, వేటు వేయడంపై కానిస్టేబుల్‌ రాణా స్పందించారు. పొడవుగా పెంచిన మీసాలను తగ్గించేది లేదని స్పష్టం చేశారు. చాలా కాలంగా మీసాలను పెంచుతున్నానని, ఇది ఆత్మగౌరవానికి సంబంధించిన విషయమని పేర్కొన్నారు. అధికారులు చెప్పినట్లుగా తాను ఎప్పుడూ యూనిఫాం లేకుండా విధులకు హాజరవలేదని స్పష్టంచేశారు.