ఎల్‌ఓసీ సమీపంలో కూలిన సైనిక హెలికాప్టర్‌ సహ పైలట్‌ మృతి

శ్రీనగర్‌: కశ్మీర్‌ ఉత్తర ప్రాంతంలో సైన్యానికి చెందిన చీతా హెలికాప్టర్‌ కూలిన ఘటనలో సహ పైలట్‌ మృతి చెందగా.. పైలట్‌ తీవ్రంగా గాయపడ్డారు. నియంత్రణ రేఖ (ఎల్‌ఓసీ)కు సమీపాన బందిపోరా జిల్లా గురెజ్‌ సెక్టార్‌లోని బరౌబ్‌ ప్రాంతం వద్ద శుక్రవారం ఈ ప్రమాదం చోటుచేసుకున్నట్లు సంబంధిత అధికారి ఒకరు తెలిపారు. పర్వత ప్రాంతాల్లో సరిహద్దుకు సమీపాన ఉన్న ఓ శిబిరం నుంచి.. అనారోగ్యానికి గురైన బీఎస్‌ఎఫ్‌ జవాన్‌ను తీసుకొచ్చేందుకు వెళుతున్న హెలికాప్టర్‌ ఉదయం 11.30 గంటల ప్రాంతంలో కూలిపోయి ఓ నాలాలో పడిపోయినట్లు చెప్పారు. ఈ ఘటనలో ప్రాణాలు కోల్పోయిన సహ పైలట్‌ను మేజర్‌ సంకల్ప్‌ యాదవ్‌ (29)గా గుర్తించారు. రాజస్థాన్‌లోని జైపుర్‌కు చెందిన ఆయన ఆయన 2015లో సైన్యంలో చేరారు. ఈ ప్రమాదంలో తీవ్రంగా గాయపడిన పైలట్‌ (లెఫ్టినెంట్‌ కర్నల్‌ ర్యాంకు అధికారి)ని ఉధమ్‌పుర్‌ కమాండ్‌ ఆసుపత్రికి తరలించినట్లు సంబంధిత అధికారి తెలిపారు.