రౌత్‌కు మరోసారి ఈడీ సమన్లు

నెలాఖరు వరకు హాజరు నుంచి ఉపశమనం

ముంబయి: మహారాష్ట్రలో శివసేన పార్టీలో రాజకీయ సంక్షోభం కొనసాగుతున్న వేళ.. అదే పార్టీ కీలక నేత, రాజ్యసభ సభ్యుడు సంజయ్‌ రౌత్‌కు ఎన్‌ఫోర్స్‌మెంట్‌ డైరెక్టరేట్‌ (ఈడీ) మంగళవారం మరోసారి సమన్లు జారీ చేసింది. ముంబయిలోని ఓ బలహీనవర్గాల గృహ సముదాయం పునరభివృద్ధి, పలు ఆర్థిక లావాదేవీలకు సంబంధించి అక్రమాల కేసులో.. నగదు అక్రమ చలామణి నిరోధక చట్టం (పీఎంఎల్‌ఏ) కింద ఈడీ ఆయన్ను ప్రశ్నించనున్నట్లు అధికారులు వెల్లడించారు. రౌత్‌కు ఈడీ సోమవారం జారీచేసిన సమన్లలో మంగళవారమే హాజరు కావాలని తెలిపిన సంగతి తెలిసిందే. అయితే తాను ఓ సమావేశానికి హాజరు కావాల్సి ఉన్నందున మరింత సమయం కావాలని ఆయన ఈడీని కోరారు. ఈమేరకు రెండు వారాల వ్యవధి కావాలని ఆయన తరఫు న్యాయవాదులు కోరగా ఈడీ ఈ నెలాఖరు వరకు మాత్రమే గడువిచ్చింది.