5 కోట్ల మంది హిందువులకు పితృతర్పణం

హరిద్వార్‌: మహాలయ(సర్వపితృ) అమావాస్య నేపథ్యంలో ఆదివారం సుప్రసిద్ధ హరిద్వార్‌ క్షేత్రంలో ఓ ధార్మిక సంస్థ దేశ విభజన సందర్భంగాను, వివిధ అల్లర్లు, హింసాత్మక ఘటనల్లోనూ మరణించిన అయిదు కోట్ల మంది హిందువులకు సామూహిక పితృతర్పణాన్ని నిర్వహించింది. నమామి గంగే ఘాట్‌లో అయోధ్య ఫౌండేషన్‌ ఈ కార్యక్రమాన్ని చేపట్టింది. వివిధ సందర్భాల్లో మరణించిన వీరందరికి అంతిమసంస్కారాలు జరగలేదని, వీరిని జాతి మరచిపోయిందని నిర్వాహకులు ఆవేదనతో తెలిపారు. దేశ విభజన సందర్భంగా పెద్దఎత్తున హిందూ భక్తులు తమ జీవితాలను త్యాగం చేశారని వివరించారు. కోల్‌కతా, గయ సహా దేశంలోని పలు పుణ్యక్షేత్రాలు, పవిత్ర నదుల వద్ద ప్రజలు పెద్ద ఎత్తున పితృతర్పణాలు అర్పించారు.