మాల్‌లో.. మీద చేతులు వేసి వేధించారు

అభిమానుల తీరుపై ఇద్దరు కేరళ నటీమణుల ఆవేదన

కోజికోడ్‌ (కేరళ): సినిమా ప్రచార కార్యక్రమంలో భాగంగా కోజికోడ్‌లోని ఓ మాల్‌కు వెళ్లిన తమతో కొందరు అభిమానులు అనుచితంగా ప్రవర్తించారని, మీద చేతులు వేసి వేధించారని కేరళ నటీమణులు ఇద్దరు చేసిన ఫిర్యాదు కలకలం రేపుతోంది. మంగళవారం రాత్రి జరిగిన ఈ ఘటనను ఇన్‌స్టాగ్రాం పోస్టు ద్వారా నటీమణులు వెల్లడించగా.. పోలీసులు తక్షణం స్పందించి విచారణ ప్రారంభించారు. సామాజిక మాధ్యమాల్లో, టీవీ ఛానళ్లలో బుధవారం రోజంతా చర్చలు కొనసాగాయి. ‘గుంపులోని ఓ వ్యక్తి నన్ను ఒడిసి పట్టుకున్నాడు. ఎక్కడ పట్టుకున్నాడో చెప్పాలంటే అసహ్యంగా ఉంది. గతంలో ఎప్పుడూ ఇలాంటి ఇబ్బంది ఎదురుకాలేదు’ అంటూ ఓ నటి ఆవేదన వ్యక్తం చేశారు. మరో నటి తన అనుభవాన్ని వివరిస్తూ.. ‘ఆ రద్దీలో వాళ్లను నియంత్రించడానికి సెక్యూరిటీ వాళ్లు చాలా కష్టపడ్డారు. భవిష్యత్తులో మాలా ఎవరూ ఇబ్బంది పడకుండా నిందితులపై చర్యలు తీసుకోవాలి’ అని కోరారు. ఈ ఘటనను తీవ్రంగా ఖండించిన కేరళ రాష్ట్ర మహిళా కమిషన్‌ చీఫ్‌ పి.సతీదేవి పోలీసులు వీలైనంత త్వరగా నిందితులను అరెస్టు చేయాలన్నారు. బాధితులు ఇద్దరిలో ఓ నటీమణి వాంగ్మూలం తీసుకొన్నామని, కొచ్చిలో ఉన్న మరో నటి వాంగ్మూలం కూడా తీసుకున్నాక ఎఫ్‌ఐఆర్‌ నమోదు చేస్తామని సీనియర్‌ పోలీసు అధికారి మీడియాకు తెలిపారు.