దేశ ప్రజలందరికీ ఒకే విధమైన జనాభా నియంత్రణ విధానం

ఆరెస్సెస్‌ అధినేత మోహన్‌ భాగవత్‌ వ్యాఖ్య

నాగ్‌పుర్‌: దేశంలో వివిధ వర్గాల్లో జనాభా అసమానతలపై రాష్ట్రీయ స్వయం సేవక్‌ సంఘ్‌ అధినేత మోహన్‌ భాగవత్‌ కీలక వ్యాఖ్యలు చేశారు. అందరికీ వర్తించే ఒకే విధమైన ‘సమగ్ర జనాభా నియంత్రణ విధానం’ను మన దేశం రూపొందించుకోవాలని తెలిపారు. దీనివల్ల అల్పసంఖ్యాక వర్గాలకు ఎలాంటి ప్రమాదం ఉండదన్నారు. మహిళా సాధికారతకు పిలుపునిచ్చారు. నాగ్‌పుర్‌లోని రేష్మీబాగ్‌ మైదానంలో నిర్వహించిన దసరా ర్యాలీలో ఆయన ప్రసంగించారు. అంతర్జాతీయ అంశాలతో పాటు మాతృభాషలో విద్యాబోధన, హిందూ దేశం, స్వయంసమృద్ధి సాధించడం, శ్రీలంకకు భారత్‌ సహాయం తదితరాలపై గంటకుపైగా ఉపన్యసించారు.