Snake Bite: పాము కాటేసిందని.. కొరికి చంపేశాడు!

జశ్‌పుర్‌: ‘పాము కరిచింది.. పామును కరిచాడు’ ఇందులో ఏది నిజమనేగా మీ సందేహం. రెండూ వాక్యాలూ నిజమే. ఎందుకంటే ఛత్తీస్‌గఢ్‌లోని జశ్‌పుర్‌ జిల్లా పంద్రపుత్‌ గ్రామంలో పహాఢీ కోర్వా గిరిజన తెగకు చెందిన దీపక్‌ రామ్‌ (12) అనే బాలుడు తమ నివాసానికి సమీపంలో ఉన్న సోదరి ఇంటి వద్ద ఆడుకుంటున్నాడు. ఆ సమయంలో అక్కడకు వచ్చిన ఓ పాము అతని చేతిపై కాటు వేసింది. దీంతో ఆగ్రహంతో ఉగిపోయిన దీపక్‌ పారిపోతున్న పామును వెంబడించి మరీ దొరకబుచ్చుకున్నాడు. వెంటనే గట్టిగా కొరికేశాడు. అనంతరం విషయం తెలియడంతో దీపక్‌ను అతని సోదరి ఆసుపత్రికి తీసుకెళ్లి చికిత్స చేయించారు. బాలుడికి ప్రాణాపాయం తప్పింది. అతను కరిచిన పాము మాత్రం మరణించింది.