Arpita Mukherjee: అర్పితా ముఖర్జీ నాలుగు కార్లు ఎక్కడ..? వాటి నిండా డబ్బేనట..!

కోల్‌కతా: పశ్చిమ బెంగాల్‌లో పాఠశాల ఉపాధ్యాయ నియామకాల కుంభకోణం కేసులో అరెస్టయిన మాజీ మంత్రి పార్థా ఛటర్జీ చుట్టూ ఈడీ ఉచ్చు మరింత బిగుస్తోంది. ఈ కేసు దర్యాప్తులో భాగంగా చేపట్టిన తనిఖీల్లో పార్థా సన్నిహితురాలు, సినీ నటి అర్పితా ముఖర్జీ ఇంట్లో గుట్టల కొద్దీ నోట్ల కట్టలు బయటపడిన విషయం తెలిసిందే. తాజాగా ఆమెకు చెందిన నాలుగు లగ్జరీ కార్లను వెతికే పనిలో అధికారులు ఉన్నారు. ఆ కార్లలో పెద్ద ఎత్తున డబ్బు దాచిపెట్టినట్లు విశ్వసనీయ వర్గాల సమాచారం.

అర్పితా ముఖర్జీని అరెస్టు చేసే సమయంలో ఆమెకు చెందిన ఓ తెల్లరంగు మెర్సిడెస్‌ కారును అధికారులు స్వాధీనం చేసుకున్నారు. అయితే దీంతో పాటు ఆమెకు ఆడీ ఏ4, హోండా సిటీ, హోండా సీఆర్‌వీ, మరో బెంజ్‌ కారు కూడా ఉన్నట్లు అధికారిక వర్గాలు తెలిపాయి. ఈ కేసులో అర్పిత అరెస్టయినప్పటి నుంచి ఈ నాలుగు కార్లు కన్పించట్లేదు. దీంతో ప్రస్తుతం ఆ వాహనాల కోసం అధికారులు గాలిస్తున్నారు. సీసీటీవీ ఫుటేజ్‌లను పరిశీలించడంతో పాటు రాష్ట్రవ్యాప్తంగా విస్తృత తనిఖీలు చేపడుతున్నట్లు సమాచారం.

ఇదిలా ఉండగా.. అర్పితా ముఖర్జీకి చెందిన మరో నివాసంలో ఈడీ అధికారులు నిన్న రాత్రి సోదాలు జరిపారు. అయితే ఆ ఇంట్లో ఎలాంటి నగదు లభించలేదని అధికారిక వర్గాల సమాచారం. మరోవైపు, అర్పిత ఇంటి చిరునామాతో ఓ రియల్‌ ఎస్టేట్‌ సంస్థ ఉన్నట్లు దర్యాప్తులో తేలింది. అంతకుముందు అర్పితకు చెందిన రెండు ఫ్లాట్లలో ఈడీ జరిపిన సోదాల్లో దాదాపు రూ.50కోట్ల నగదు, బంగారు ఆభరణాలు బయటపడటం రాష్ట్రవ్యాప్తంగా కలకలం రేపింది. అయితే ఈ డబ్బుతో తనకు ఎలాంటి సంబంధం లేదని, పార్థా అనుచరులే ఇక్కడ దాచిపెట్టి ఉంటారని అర్పిత చెప్పారు. డబ్బు బయటపడిన గదిలోకి తనను వెళ్లనిచ్చేవారు కాదని ఆమె దర్యాప్తులో చెప్పినట్లు తెలుస్తోంది.

నాపై కుట్రలు చేస్తున్నారు: పార్థా

ఈ కుంభకోణం వ్యవహారంపై పార్థా ఛటర్జీ తాజాగా స్పందించారు. ఈ కేసులో ఇరికించేందుకు తనపై కొందరు కుట్రలు చేస్తున్నారని ఆరోపించారు. నోట్ట కట్టల వ్యవహారం రాజకీయంగా తీవ్ర దుమారం రేపడంతో పార్థాను నిన్న మంత్రి పదవి నుంచి తొలగించిన విషయం తెలిసిందే. టీఎంసీ పార్టీ నుంచి కూడా సస్పెండ్‌ చేశారు.