Ajit Doval: అజిత్‌ డోభాల్‌ ఇంటి వద్ద వ్యక్తి హల్‌చల్‌.. కారుతో దూసుకెళ్లేందుకు యత్నం

దిల్లీ: జాతీయ భద్రతా సలహాదారు(ఎన్‌ఎస్‌ఏ) అజిత్‌ డోభాల్ నివాసం వద్ద ఓ అపరిచిత వ్యక్తి హల్‌చల్‌ చేశాడు. డోభాల్‌ ఇంట్లోకి కారుతో దూసుకెళ్లేందుకు యత్నించాడు. అప్రమత్తమైన భద్రతా సిబ్బంది కారును అడ్డగించి ఆ వ్యక్తిని అదుపులోకి తీసుకున్నారు. అనంతరం అతడిని విచారించగా.. తన శరీరంలో ఎవరో చిప్‌ పెట్టారని, వారే తనను కంట్రోల్‌ చేస్తున్నారని చెప్పాడు.

అయితే ఎంఆర్‌ఐ స్కాన్‌లో అతడి శరీరంలో ఎలాంటి చిప్‌ లేదని తేలడం గమనార్హం. అతడి మానసిక స్థితి సరిగ్గా లేదని ప్రాథమిక విచారణలో గుర్తించారు. బెంగళూరుకు చెందిన ఆ వ్యక్తి అద్దె కారులో డోభాల్‌ ఇంటికి వచ్చినట్లు తెలిసింది. ఘటన సమయంలో డోభాల్ ఇంట్లోనే ఉన్నారని దిల్లీ పోలీసులు తెలిపారు. తదుపరి విచారణ కోసం ఆ వ్యక్తిని దిల్లీ పోలీసులు ప్రత్యేక విభాగానికి అప్పగించారు.