14 రాష్ట్రాలకు రూ.6వేలకోట్లు..!

ఇంటర్నెట్‌డెస్క్‌: కేంద్ర ప్రభుత్వం బుధవారం 14 రాష్ట్రాలకు రూ.6,194 కోట్లను విడుదల చేసింది. రాష్ట్రాల ఆదాయాల లోటును తీర్చేందుకు 12వ ఇన్‌స్టాల్‌మెంట్‌ను చెల్లించింది. ఈ చివరి విడత మొత్తంతో కలిపి ఇప్పటి వరకు రూ.74,340 కోట్లను రాష్ట్రాలకు విడుదల చేసినట్లైంది. పీడీఆర్‌డీ కింద వీటిని ప్రభుత్వం కేటాయించింది. ఈ విషయాన్ని ఆర్థిక శాఖ ఒక ప్రకటనలో తెలియజేసింది.  ఈ ఆర్థిక సంవత్సరానికి పీడీఆర్‌డీ కింద 14 రాష్ట్రాలకు రూ.74,340 కోట్లు విడుదల చేయాలని 15వ ఆర్థిక సంఘం సూచించింది. 

రాజ్యాంగంలోని ఆర్టికల్‌ 275 ప్రకారం ఈ నిధులను కేటాయిస్తున్నారు. అధికారాలు బదలాయించిన రాష్ట్రాలకు ఈ క్రమంలో 15వ ఆర్థిక సంఘం సిఫార్సుల మేరకు ఆదాయలోటును తగ్గించేలా ఈ సొమ్ము అందుతోంది. అర్హులైన రాష్ట్రాలను ఆర్థికసంఘమే ఎంపిక చేస్తుంది. ఈ సారి ఆదాయలోటు ఉన్న రాష్ట్రాలుగా ఎంపికైన వాటిలో ఆంధ్రప్రదేశ్‌, అసోమ్‌, హిమాచల్‌ ప్రదేశ్‌, కేరళ ,మణిపూర్‌, మేఘాలయా, మిజోరాం, నాగాల్యాండ్‌, పంజాబ్‌, సిక్కిం, తమిళనాడు, త్రిపుర, ఉత్తరాఖండ్‌, వెస్ట్‌బెంగాల్‌లు ఉన్నాయి.