Manish Sisodia: మనీశ్‌ సిసోదియాకు వ్యతిరేకంగా సాక్ష్యాలెక్కడ..?: దర్యాప్తు సంస్థలకు సుప్రీం ప్రశ్న

దిల్లీ: మద్యం కుంభకోణం (Delhi excise policy scam case) కేసులో ఆప్‌ నేత, దిల్లీ మాజీ ఉపముఖ్యమంత్రి మనీశ్‌ సిసోదియా (Manish Sisodia)కు సంబంధించిన రెండు బెయిల్‌ పిటిషన్లపై సుప్రీంకోర్టు (Supreme Court) గురువారం మరోసారి విచారణ చేపట్టింది. ఈ సందర్భంగా ఈ కేసును దర్యాప్తు చేస్తున్న కేంద్ర ఏజెన్సీలకు సర్వోన్నత న్యాయస్థానం పలు కీలక ప్రశ్నలు సంధించింది. ఈ కేసులో సిసోదియాకు వ్యతిరేకంగా ఎలాంటి సాక్ష్యాలున్నాయని ప్రశ్నించింది.

కొందరు వ్యక్తులకు లబ్ధిచేకూరే విధంగా ఈ మద్యం విధానాన్ని రూపొందించారని సీబీఐ ఆరోపించింది. ఇందుకు సంబంధించి కొన్ని వాట్సాప్‌ సందేశాలను సీబీఐ కోర్టుకు సాక్ష్యంగా సమర్పించింది. అయితే ఆ సందేశాల ఆమోదయోగ్యతపై సుప్రీంకోర్టు అభ్యంతరం వ్యక్తం చేసింది. ‘‘వారు దాని గురించి (లంచాలపై విజయ్‌ నాయర్‌, మనీశ్‌ సిసోదియా చర్చలను ఉద్దేశిస్తూ) మాట్లాడుకోవడం మీరు చూశారా? ఈ సాక్ష్యాలు ఆమోదయోగ్యంగా ఉంటాయా? ఇది అప్రూవర్‌గా మారిన ఓ వ్యక్తి ఇచ్చిన వాంగ్మూలం కాదా?మరి దీన్నెలా సాక్ష్యంగా భావించగలం’’ అని కోర్టు వ్యాఖ్యానించింది. ఈ కేసులో సిసోదియాకు వ్యతిరేకంగా సరైనా ఆధారాలను చూపించలేకపోయారని కోర్టు అభిప్రాయపడింది.

మద్యం కుంభకోణం కేసులో ‘ఆప్‌’ పేరు..? ఈడీ కసరత్తు

ఈ కేసులో నిందితుడిగా ఉన్న వ్యాపారవేత్త దినేశ్‌ అరోఢా వాంగ్మూలం మినహా సిసోదియాకు వ్యతిరేకంగా ఇంకా ఏం ఆధారాలున్నాయని సుప్రీం ధర్మాసనం దర్యాప్తు సంస్థలను ప్రశ్నించింది. ‘‘మనీశ్ సిసోదియా డబ్బులు తీసుకున్నారని దర్యాప్తు సంస్థలు ఆరోపించాయి. మరి ఆ డబ్బులు ఆయనకు ఎలా చేరాయి? రూ.100 కోట్లు, రూ.30 కోట్లు అని రెండు సంఖ్యలు చెప్పారు. వాటిని ఎవరు చెల్లించారు? డబ్బులిచ్చినట్లు ఆధారాలెక్కడ? దినోశ్  ఈ కేసులో నిందితుడే. అతడి వాంగ్మూలం కాకుండా ఇంకా ఏమైనా సాక్ష్యాలున్నాయా?’’ అని ధర్మాసనం ప్రశ్నల వర్షం కురిపించింది. ప్రస్తుతం ఈ కేసులో వాదనలు కొనసాగుతున్నాయి.