దిల్లీ మహిళా కమిషన్‌లో 52 మంది ఒప్పంద ఉద్యోగుల తొలగింపు

దిల్లీ: దిల్లీ మహిళా కమిషన్‌ (డీసీడబ్ల్యూ)లో అక్రమంగా నియమితులైన 52 మంది ఒప్పంద ఉద్యోగులను స్త్రీ, శిశు అభివృద్ధి (డబ్ల్యూసీడీ) శాఖ తొలగించారు. జూన్‌, 2017లో ఓ కమిటీ సమర్పించిన నివేదిక ఆధారంగా ‘తొలగింపు’ నిర్ణయం తీసుకున్నట్లు ఓ అధికారి చెప్పారు. స్త్రీ, శిశు అభివృద్ధి శాఖ 223 మంది ఒప్పంద ఉద్యోగులను తొలగించినట్లు గత నెల 29న ఆదేశాలు వెలువడ్డాయి. అయితే 52 మందిని మాత్రమే తొలగించినట్లు గురువారం స్త్రీ, శిశు అభివృద్ధి శాఖ ఓ ప్రకటన విడుదల చేసింది. మహిళా కమిషన్‌లో మొత్తం 223 పోస్టులను అక్రమంగా సృష్టించారని, అయితే 52 మందిని మాత్రమే నియమించారని ఓ అధికారి చెప్పారు. నివేదిక ఆధారంగా స్త్రీ, శిశు అభివృద్ధి శాఖ లెఫ్టినెంట్‌ గవర్నర్‌ (ఎల్జీ) వి.కె.సక్సేనాకు తొలగింపు ప్రతిపాదనలు పంపిందని, ఎల్జీ నుంచి ఆమోదం లభించడంతో ఆ దేశాలు జారీ అయ్యాయని వివరించారు.