Covaxin: కొవాగ్జిన్‌ను గుర్తించిన ఆస్ట్రేలియా

మెల్‌బోర్న్‌: భారత్‌లో దేశీయంగా తయారైన కరోనా టీకా కొవాగ్జిన్‌ను ఆస్ట్రేలియా సోమవారం అధికారికంగా గుర్తించింది. మహమ్మారి నేపథ్యంలో సుమారు 20 నెలల పాటు మూసివేసిన సరిహద్దులను తిరిగి తెరిచిన తరుణంలో ఈ నిర్ణయం వెలువడింది. ఆస్ట్రాజెనెకా-ఆక్స్‌ఫర్డ్‌ విశ్వవిద్యాలయం సంయుక్తంగా రూపొందించిన కొవిషీల్డ్‌ను ఇప్పటికే ఆ దేశం అధికారికంగా గుర్తించింది. ‘‘భారత్‌ బయోటెక్‌ తయారుచేసిన కొవాగ్జిన్‌, చైనాలోని సినోఫామ్‌ తయారుచేసిన బీబీఐబీపీ-కోర్‌వి టీకాలను పర్యాటకుల రాకపోకలకు సంబంధించి అధికారికంగా గుర్తించాలని థెరాప్టిక్‌ గూడ్స్‌ అడ్మినిస్ట్రేషన్‌ నిర్ణయించింది’’ అని సోమవారం ఓ అధికారిక ప్రకటన విడుదలైంది. 12 సంవత్సరాలు, అంతకంటే ఎక్కువ వయసున్న వారు కొవాగ్జిన్‌ టీకా పూర్తిస్థాయిలో తీసుకుంటే ఇకపై ఆస్ట్రేలియా వెళ్లవచ్చు.  

ప్రధాని మోదీ ధన్యవాదాలు

కొవాగ్జిన్‌ను ఆస్ట్రేలియా గుర్తించడం పట్ల భారత ప్రధాని మోదీ సంతోషం వ్యక్తం చేశారు. ఈ మేరకు ఆస్ట్రేలియా ప్రధాని స్కాట్‌ మోరిసన్‌కు ట్విటర్‌ వేదికగా సోమవారం ధన్యవాదాలు తెలిపారు.