china: చైనా కవ్వింపు చర్యలపై అమెరికా ఆందోళన..!

ఇంటర్నెట్‌డెస్క్‌: చైనా తరచూ పొరుగు దేశాలను కవ్వించేలా ప్రవర్తించడంపై అమెరికా ఆందోళన వ్యక్తం చేసింది. బీజింగ్‌ ప్రవర్తన ప్రపంచ శాంతికి విఘాతంగా మారే ప్రమాదం ఉందని పేర్కొంది. ఈ మేరకు శ్వేతసౌధం ప్రెస్‌ సెక్రటరీ జెన్‌సాకీ ఓ ప్రశ్నకు సమాధానంగా స్పందించారు. భారత్‌-చైనా మధ్య 14వ విడత సైనిక చర్చలు ప్రారంభానికి ఒక రోజు ముందు ఈ ప్రకటన వెలువడటం గమనార్హం. 

శ్వేతసౌధంలో రోజువారీ ప్రెస్‌ బ్రీఫింగ్‌ సమయంలో అమెరికాతో చైనా చర్చల విషయం ప్రస్తావనకు వచ్చింది. ఈ సమయంలో భారత్‌-చైనా వివాదంపై స్పందించాలని కొందరు కోరారు. దీనికి స్పందించిన సాకీ.. ‘‘భారత్‌-చైనా సరిహద్దుల వద్ద పరిస్థితిని జాగ్రత్తగా గమనిస్తున్నాం. ఈ సరిహద్దు వివాదాన్ని చర్చల ద్వారా పరిష్కరించుకోవడానికి మేము పూర్తి మద్దతు ఇస్తాము. ఆ ప్రాంతంలో, ప్రపంచంలో మిగిలిన చోట్ల బీజింగ్‌ ప్రవర్తనను ఏ కోణంలో చూడాలో మాకు స్పష్టంగా తెలుసు. చైనా పొరుగు దేశాలను కవ్వించడంపై ఆందోళన చెందుతున్నాం. ఆ విషయంలో మేము మా భాగస్వాములతో కలసి పనిచేస్తాము’’ అని జెన్‌సాకీ పేర్కొన్నారు.

ఈ నెల 12వ తేదీ నుంచి భారత్‌-చైనా మధ్య సైనికాధికారుల స్థాయిలో 14విడత చర్చలు జరగనున్నాయి. 2020 ఏప్రిల్‌లో వివాదం మొదలైనప్పటి నుంచి పలు విడతలుగా జరిగిన చర్చలు కొంత మేరకు సఫలమై తూర్పు లద్ధాక్‌లోని కీలక ప్రాంతాల్లో దళాల ఉపసంహరణ జరిగింది.