Sharwanand: శర్వానంద్‌.. మరో కబురు

రక్షితా రెడ్డితో త్వరలో ఏడడుగులు వేయనున్నారని శర్వానంద్‌ (Sharwanand) ఇటీవలే పెళ్లి కబురు వినిపించారు. మరోవైపు మార్చి నుంచి తన కొత్త చిత్రాన్ని పట్టాలెక్కించేందుకు సిద్ధమవుతున్నారు. దీనికి శ్రీరామ్‌ ఆదిత్య దర్శకత్వం వహించనున్న సంగతి తెలిసిందే. కాగా, ఇప్పుడాయన మరో దర్శకుడితోనూ సినిమా చేసేందుకు అంగీకారం తెలిపారని సమాచారం. ‘118’ చిత్రంతో సినీ ప్రియుల్ని మెప్పించారు కె.వి.గుహన్‌. ఆయన ఇటీవలే శర్వాకు ఓ కథ వినిపించారని.. అది నచ్చడంతో ఆ ప్రాజెక్టు చేసేందుకు పచ్చజెండా ఊపారని తెలిసింది. దీనికి దిల్‌ రాజు నిర్మాతగా వ్యవహరించనున్నట్లు సమాచారం. శ్రీరామ్‌ ఆదిత్య చిత్రం పూర్తయ్యాకే ఈ సినిమా పట్టాలెక్కనుందని టాక్‌.