Siddharth: దానివల్ల మా సినిమాకు ఎంతో నష్టం.. ప్రెస్‌మీట్‌ అడ్డుకోవడంపై సిద్ధార్థ్‌

ఇంటర్నెట్‌ డెస్క్‌: కర్ణాటకలో ఇటీవల తనకెదురైన చేదు అనుభవంపై హీరో సిద్ధార్థ్‌ (Siddharth) స్పందించారు. తన సినిమా ప్రెసెమీట్‌ను నిరసనకారులు అడ్డుకోవడంతో ఎంతో నిరాశపడినట్లు తెలిపారు. తన సినిమాకూ అక్కడ జరుగుతున్న జల వివాదానికి ఎలాంటి సంబంధం లేదని ఆయన అన్నారు. దీనివల్ల చిత్రానికి భారీ నష్టం కలిగిందని పేర్కొన్నారు.

‘‘చిన్నా’ సినిమా నిర్మాతగా విడుదలకు ముందే నేను ఈ చిత్రాన్ని చాలా మందికి చూపించాలని అనుకున్నాను. అందులో భాగంగానే చెన్నైలో కొంతమందికి చూపించాను. అలాగే బెంగుళూరులో మీడియాకూ ఈ చిత్రాన్ని చూపించాలని ప్లాన్‌ చేశా. విడుదలకు ముందే 2000 మంది విద్యార్థులకు చూపించాలనుకున్నా. ఇప్పటి వరకు ఏ సినిమా దర్శక నిర్మాతలు ఇలా చేయలేదు. కానీ, బంద్‌ కారణంగా మేం అన్నింటినీ రద్దు చేశాం. దీనివల్ల మాకు భారీ నష్టం వాటిల్లింది.’’

బాధతో జీవించడం అలవాటు చేసుకున్నా: విజయ్‌ ఆంటోనీ

‘‘దానికి మించిన బాధకరమైన విషయమేమిటంటే మంచి చిత్రాన్ని అక్కడి ప్రజలతో పంచుకోలేకపోయాం. ఇది నాకెంతో నిరాశ కలిగించింది. ప్రెస్‌మీట్‌ తర్వాత అందరికీ సినిమా చూపించాల్సి ఉంది. కానీ, అక్కడ ఏం జరిగిందో మీరంతా చూశారు. అన్ని కెమెరాల ముందు జరిగిన దాని గురించి నేను మాట్లాడదలచుకోవడం లేదు. సినిమాకు మంచి ప్రేక్షకాదరణ వస్తోంది. నా సినిమాకు ఈ వివాదానికి ఎలాంటి సంబంధం లేదు. నేను తీసే సినిమాల్లో సామాజిక బాధ్యత కనిపిస్తుందని నేను నమ్ముతున్నా’’ అని సిద్ధార్థ్‌ అన్నారు. మరోవైపు ఈ సంఘటనపై కర్ణాటక ప్రజల తరపున కన్నడ నటులు సిద్ధార్థ్‌కు క్షమాపణలు చెబుతున్నారు. ఇప్పటికే ప్రకాశ్‌ రాజ్‌, శివరాజ్‌ కుమార్‌లు ఎక్స్‌ వేదికగా దీనిపై వారి అభిప్రాయాన్ని తెలియజేస్తూ.. క్షమాపణలు చెప్పారు.