Mahesh Babu: దుబాయ్‌లో చర్చలు

మహేష్‌బాబు(Mahesh Babu) - త్రివిక్రమ్‌ కలయికలో తెరకెక్కనున్న సినిమా(SSMB28) గురించి చర్చలు మొదలయ్యాయి. వచ్చే ఏడాది ఆరంభంలోనే సినిమాని సెట్స్‌పైకి తీసుకెళ్లే ప్రయత్నాలు జరుగుతున్నట్టు తెలుస్తోంది. మహేష్‌బాబు, త్రివిక్రమ్‌తోపాటు సంగీత దర్శకుడు తమన్‌, నిర్మాత సూర్య దేవర నాగవంశీ దుబాయ్‌లో భేటీ అయ్యారు. ఆ విషయాన్ని మహేష్‌ స్వయంగా ట్విటర్‌ ద్వారా వెల్లడించారు. సంగీతంతోపాటు చిత్రీకరణకి సంబంధించి చర్చలు సాగించినట్టు సమాచారం. ‘అతడు’, ‘ఖలేజా’ తర్వాత మహేష్‌ - త్రివిక్రమ్‌ కలయికలో రూపొందుతున్న సినిమా ఇది. హారిక అండ్‌ హాసిని క్రియేషన్స్‌ పతాకంపై ఎస్‌.రాధాకృష్ణ (చినబాబు) నిర్మిస్తున్నారు. మహేష్‌ 28వ సినిమాగా పట్టాలెక్కనున్న ఈ చిత్రం కోసం కథానాయికగా పూజాహెగ్డేని ఎంపిక చేశారు. చాలా రోజుల కిందటే ఈ సినిమాని ప్రకటించారు.