YSRCP: వైకాపాలో వర్గపోరు.. మంత్రి అంబటికి వ్యతిరేకంగా సర్పంచ్‌ల సమావేశం

సత్తెనపల్లి: పల్నాడు జిల్లా సత్తెనపల్లి వైకాపాలో వర్గ విభేదాలు నివురు గప్పిన నిప్పులా ఉన్నాయి. మంత్రి అంబటి రాంబాబుకు వ్యతిరేకంగా పలువురు నేతలు ధిక్కార స్వరం వినిపిస్తున్నారు. ఇప్పటికే పలుమార్లు సమావేశమైన అసమ్మతి నేతలు తాజాగా ఇవాళ వైకాపా నేత చిట్టా విజయభాస్కర్‌రెడ్డి నివాసంలో సమావేశమయ్యారు. 11 మంది సర్పంచ్‌లు, ఇద్దరు ఎంపీటీసీలు సమావేశంలో పాల్గొన్నారు. మంత్రి అంబటి తమను పట్టించుకోవటం లేదని వారు ఆరోపిస్తున్నారు. గ్రామాల్లో అంబటి అనుచరుల పెత్తనం పెరిగిందని, స్థానిక ప్రజాప్రతినిధులమైన తమను విస్మరించి కార్యక్రమాలు చేస్తున్నారని ఆగ్రహం వ్యక్తంచేశారు. ఏదైనా ప్రజా సమస్యపై మంత్రిని కలవాలని ప్రయత్నించినా కుదరటం లేదన్నారు. రెండు రోజుల్లో మరోసారి సమావేశమై భవిష్యత్‌ కార్యాచరణ ప్రకటిస్తామని తెలిపారు.