సీఏఏపై వెనకడుగు వేయం: కేంద్రమంత్రి

దిల్లీ: గతేడాది పార్లమెంట్‌ ఆమోదించిన పౌరసత్వ సవరణ చట్టం (సీఏఏ)పై వెనక్కి తగ్గే ప్రసక్తే లేదని కేంద్ర న్యాయశాఖ మంత్రి రవిశంకర్‌ ప్రసాద్‌ తేల్చిచెప్పారు. ఈ చట్టాన్ని వ్యతిరేకిస్తున్న వాళ్లను ఒప్పించేందుకు ప్రయత్నిస్తామని చెప్పారు. గురువారం ఆదాయపుపన్ను అప్పిలేట్‌ ట్రైబ్యునల్‌ సర్క్యూట్‌ ప్రారంభోత్సవంలో మాట్లాడిన రవిశంకర్‌.. మతపరమైన హింసకు గురై పాకిస్థాన్‌, బంగ్లాదేశ్, ఆఫ్గనిస్థాన్‌ల నుంచి వచ్చే వాళ్లకు భారత పౌరసత్వం ఎందుకు ఇవ్వకూడదో చెప్పాలని ప్రశ్నించారు. సీఏఏను వ్యతిరేకించేవాళ్లను ఒప్పించేందుకు ప్రయత్నిస్తామన్న ఆయన.. నిద్రపోయేవాళ్లను లేపడం సులభమే గానీ.. నిద్ర నటించేవాళ్లను మేల్కొల్పడం ఎవరితరమూ కాదని వ్యాఖ్యానించారు. అన్ని మతాల ప్రజలు శాంతియుతంగా కలిసిమెలిసి జీవించడమే భారతదేశ విలక్షణీయత అని వ్యాఖ్యానించారు. మరోవైపు, సీఏఏ ఆందోళనలతో ఈశాన్య దిల్లీలో హింసాత్మక ఘటనలు చోటుచేసుకున్నాయి. ఈ ఘటనల్లో ఇప్పటివరకు దాదాపు 35 మంది ప్రాణాలు కోల్పోగా.. వందలాది మంది గాయపడిన విషయం తెలిసిందే.