Balineni Srinivasa Reddy: నేను చెన్నైలో జూదం ఆడేవాడిని

మాజీ మంత్రి బాలినేని వ్యాఖ్య

ఒంగోలు ట్రంకురోడ్డు, న్యూస్‌టుడే: మాజీ మంత్రి, ఒంగోలు ఎమ్మెల్యే బాలినేని శ్రీనివాసరెడ్డి సంచలన వ్యాఖ్యలు చేశారు. ఒంగోలులో వైకాపా ముఖ్య కార్యకర్తల సమావేశంలో మాట్లాడుతూ తనకు గతంలో జూదం అలవాటు ఉందని, చెన్నైలో ఆడేవాడినని వ్యాఖ్యానించారు. సమావేశంలో పాల్గొన్న వైకాపా ప్రాంతీయ సమన్వయకర్త, ఎంపీ (రాజ్యసభ) బీద మస్తాన్‌రావు గురించి ప్రస్తావిస్తూ ఎంపీ తనకు మంచి స్నేహితుడని, ఆయన తెదేపాలో ఉన్నప్పటి నుంచే పరిచయం ఉందన్నారు. తరచూ చెన్నైలో కలుసుకునేవారమని.. తనకు జూదం అలవాటు ఉంది గానీ, ఆయనకు లేదన్నారు. దీంతో సభ నవ్వులతో నిండిపోయింది. ఇవన్నీ పాత విషయాలంటూ సర్దిపుచ్చే యత్నం చేశారు. తాను చేసే ఖర్చులు అధికంగా ఉండేవని అప్పట్లో మస్తాన్‌రావు వ్యాఖ్యానించేవారన్నారు.