భారాసను వీడిన మాజీ ఎమ్మెల్యే ఆరెపల్లి మోహన్‌

కరీంనగర్‌, ఈనాడు: కరీంనగర్‌ జిల్లా మానకొండూర్‌ మాజీ శాసనసభ్యుడు ఆరెపల్లి మోహన్‌ భారాసను వీడారు. కరీంనగర్‌లో గురువారం విలేకరులతో మాట్లాడుతూ తాను పార్టీ సభ్యత్వానికి రాజీనామా చేస్తున్నట్లు ప్రకటించారు. పార్టీ ప్రకటించిన అభ్యర్థుల జాబితాలో ఆయన పేరు లేకపోవడంతో కొన్నిరోజులుగా అనుచరులు, అభిమానులతో సమావేశమవుతున్నారు. ఈ క్రమంలో ప్రణాళికా సంఘం రాష్ట్ర ఉపాధ్యక్షుడు వినోద్‌కుమార్‌ ఇటీవల ఆయనతో ఫోన్‌లో మాట్లాడారు. పార్టీలో సముచిత స్థానం కల్పిస్తామని సముదాయించారు. అయినప్పటికీ భారాసను వీడాలని నిర్ణయించుకున్న మోహన్‌ అధిష్ఠానానికి తన రాజీనామా లేఖ పంపిస్తానని చెప్పారు. త్వరలో భవిష్యత్తు కార్యాచరణ వెల్లడిస్తానని తెలిపారు.