PrakashRaj: రాజకీయ పార్టీల ఒత్తిడితో ఫోను స్విచ్చాఫ్‌ చేసుకున్నా: ప్రకాష్‌రాజ్‌

కోజికోడ్‌: లోక్‌సభ ఎన్నికల్లో పోటీ చేయాలని మూడు రాజకీయ పార్టీలు తనపై ఒత్తిడి తీసుకువస్తున్నాయని ప్రముఖ నటుడు ప్రకాష్‌రాజ్‌ తెలిపారు. పార్టీలు తన సిద్ధాంతాలను చూసి కాకుండా కేవలం ప్రధాని మోదీని విమర్శిస్తున్నందున ఈ ఒత్తిడి తెస్తున్నాయని.. వాటి వలలో పడబోనని చెప్పారు. కేరళ సాహితీ ఉత్సవంలో పాల్గొన్న ప్రకాష్‌రాజ్‌ రాజకీయాల గురించి మాట్లాడారు. ‘‘ఎన్నికలు వస్తున్నాయి. నా వెంటపడిన ఆ మూడు రాజకీయ పార్టీల ఒత్తిడి భరించలేక ఫోను స్విచ్చాఫ్‌ చేసుకున్నా. కేవలం మోదీ మీద వ్యతిరేకత తప్ప ప్రజల కోసం వాళ్లు రావడం లేదు. ఈ రోజుల్లో రాజకీయ పార్టీలకు సొంత గొంతుక ఉండటం లేదు. అందుకే అభ్యర్థుల కోసం ఈ వెదుకులాట. మనకెంత దుర్గతి పట్టిందీ!’’ అన్నారు. దేశ, విదేశాల నుంచి దాదాపు 400 మంది ప్రముఖులు పాల్గొన్న కేరళ సాహితీ ఉత్సవం ఆదివారంతో ముగిసింది.