జనం తోసుకుంటుంటే చోద్యం చూశారు

పోలీసుల తీరుపై ధూళిపాళ్ల నరేంద్ర ధ్వజం

ఈనాడు డిజిటల్‌, అమరావతి: ప్రధాని మోదీ పాల్గొన్న బొప్పూడి ప్రజాగళం సభకు భద్రత కల్పించడంలో రాష్ట్ర పోలీసులు ఘోరంగా విఫలమయ్యారని తెదేపా మాజీ ఎమ్మెల్యే ధూళిపాళ్ల నరేంద్రకుమార్‌ ధ్వజమెత్తారు. మంగళగిరిలోని పార్టీ కేంద్ర కార్యాలయంలో సోమవారం ఆయన విలేకర్లతో మాట్లాడారు. ‘‘సభలో ప్రధాని కూర్చున్న వేదిక వైపు జనం తోసుకువస్తుంటే పోలీసులకు నియంత్రించే బాధ్యత లేదా.. ప్రభుత్వంలో పనిచేసే కొంతమంది అధికారులు ఉద్దేశపూర్వకంగానే సభకు అడ్డంకులు సృష్టించేందుకు యత్నించారు. స్వయంగా మోదీ కలగజేసుకుని స్తంభాలపైకి ఎక్కిన వారిని దిగాలని వారించడం పోలీసుల నిర్లక్ష్యానికి నిదర్శనం’ అని పేర్కొన్నారు.