Amit Shah: రామాలయానికి వ్యతిరేకంగానే నల్ల దుస్తుల్లో నిరసనలు

కాంగ్రెస్‌పై అమిత్‌ షా ఆరోపణ

దిల్లీ: అధిక ధరలు, నిరుద్యోగ సమస్యపై కాంగ్రెస్‌ పార్టీ శుక్రవారం దేశ వ్యాప్తంగా నిర్వహించిన నిరసనలు.. ఓ వర్గాన్ని సంతృప్తిపరిచే రాజకీయాల్లో భాగంగా చేపట్టినవేనని కేంద్ర హోంమంత్రి, భాజపా అగ్రనేత అమిత్‌ షా ఆరోపించారు. దిల్లీలో శుక్రవారం ఆయన పార్లమెంటు వద్ద విలేకరులతో మాట్లాడుతూ...‘‘2020 ఆగస్టు 5న అయోధ్యలో రామాలయ నిర్మాణానికి ప్రధాని మోదీ శంకుస్థాపన చేశారు. దానికి వ్యతిరేకమని సందేశమిచ్చేందుకే రెండేళ్ల తర్వాత అదే రోజును కాంగ్రెస్‌ పార్టీ నల్ల దుస్తులతో నిరసనలకు ఎంచుకుంద’’ని పేర్కొన్నారు. కోట్ల మంది ప్రజల మనోభావాలతో ముడిపడిన 550 ఏళ్ల నాటి వివాదాన్ని ప్రధాని మోదీ శాంతియుతంగా పరిష్కరించారని అమిత్‌ షా తెలిపారు.