చిత్తూరులో 14 మంది తెదేపా నేతల అరెస్టు

చిత్తూరు లీగల్‌, పూతలపట్టు, న్యూస్‌టుడే: చిత్తూరు జిల్లా పూతలపట్టు మండలం వేపనపల్లె గ్రామంలో గురువారం ఎమ్మెల్యే బాబు పర్యటన నేపథ్యంలో జరిగిన పరిణామాలపై పోలీసులు మొత్తం 14 మందిని అరెస్టు చేశారు. వీరిని శుక్రవారం ఉదయం రహస్యంగా జిల్లా కేంద్రమైన చిత్తూరుకు తరలించారు. 2 కేసుల్లో అరెస్టు చూపి సాయంత్రం న్యాయమూర్తి ఎదుట హాజరుపరిచారు. రాత్రి 12.30 గంటల వరకు విచారణ కొనసాగింది. తెదేపా నేతలకు కోర్టు 18 వరకు రిమాండ్‌ విధించింది. ఎమ్మెల్యే పర్యటన సందర్భంగా ఓ ఇంజినీరింగ్‌ విద్యార్థి ప్రభుత్వ పథకాల గురించి ప్రశ్నించడం.. అతడిని పోలీసులు అదుపులోకి తీసుకోవడం.. అనంతర పరిణామాల కారణంగా పది మందిని అదుపులోకి తీసుకున్నారు. అదే సమయంలో వైకాపా మండల కన్వీనర్‌ శ్రీకాంత్‌రెడ్డి కారుపై రాళ్ల దాడి చేశారనే కేసులో.. గురువారం అర్ధరాత్రి తెదేపా మండల కన్వీనర్‌ దొరబాబు, మాజీ కన్వీనర్‌ చంద్రమౌళి, గోపాలనాయుడు, గుణలను అదుపులోకి తీసుకున్నారు.