మోదీ పాలనలో దేశం తిరోగమనం

సీపీఐ జాతీయ కార్యదర్శి నారాయణ

తిరుపతి(గాంధీరోడ్డు), న్యూస్‌టుడే: ఆజాదీ కా అమృత్‌ మహోత్సవ్‌ పేరుతో ప్రధాని మోదీ అత్యుత్సాహం ప్రదర్శిస్తున్నారని సీపీఐ జాతీయ కార్యదర్శి నారాయణ విమర్శించారు. తిరుపతిలోని ఇందిరా మైదానంలో ఆదివారం జరిగిన ఆ పార్టీ జిల్లా ప్రథమ మహాసభలో ఆయన మాట్లాడారు. ఖాదీ జెండాలనే వాడేలా చేసి ఉంటే చేనేత కార్మికులకు లబ్ధిచేకూరేదని, అలాకాకుండా కార్పొరేట్‌ సంస్థ ద్వారా దిగుమతి చేశారని ఆరోపించారు. దేశానికి స్వాతంత్య్రం సిద్ధించడంలో కమ్యూనిస్టుల పాత్ర కీలకమని తెలిపారు. మోదీ పాలనలో దేశం తిరోగమనంలో పయనిస్తోందన్నారు. అక్టోబరులో విజయవాడ వేదికగా జరగనున్న సీపీఐ జాతీయ మహాసభల్లో భాజపా, వైకాపా అరాచకాలపై తీర్మానం చేస్తామని వివరించారు. సీపీఐ రాష్ట్ర కార్యదర్శి రామకృష్ణ మాట్లాడుతూ దళిత యువకుడిని హత్య చేసిన ఎమ్మెల్సీ అనంతబాబు, అశ్లీలంగా కన్పించిన ఎంపీని ముఖ్యమంత్రి వెనకేసుకు వస్తున్నారని ఆరోపించారు.