జమ్మూ-కశ్మీర్‌లో ‘బయటి ఓటర్లు’ వద్దు!

శ్రీనగర్‌: జమ్మూ-కశ్మీర్‌లో సాధారణ నివాసం ఉంటున్న బయట వ్యక్తులు ఓటర్లుగా నమోదు కావొచ్చని ఎన్నికల అధికారి పేర్కొనడంపై నేషనల్‌ కాన్ఫరెన్స్‌, పీపుల్స్‌ డెమోక్రాటిక్‌ పార్టీ (పీడీపీ) తదితర పార్టీలు ఆందోళన వ్యక్తం చేశాయి. దీనిపై చర్చించేందుకు ఈనెల 22న శ్రీనగర్‌లోని తన నివాసంలో అఖిలపక్ష సమావేశానికి ఎన్‌సీ అధినేత ఫరూక్‌ అబ్దుల్లా పిలుపునిచ్చారు. జమ్మూ-కశ్మీర్‌ పరిధిలో భాజపా మినహా అన్ని ప్రధాన రాజకీయ పార్టీలనూ ఆయన సమావేశానికి ఆహ్వానించినట్లు ఎన్‌సీ అధికార ప్రతినిధి ఇమ్రాన్‌ నబీ దార్‌ తెలిపారు. జమ్మూ-కశ్మీర్‌లో బయటవారితో సహా 25 లక్షల మంది కొత్త ఓటర్లు జాబితాల్లో చేరే అవకాశం ఉందని చీఫ్‌ ఎలక్టోరల్‌ అధికారి (సీఈవో) హిర్దేశ్‌ కుమార్‌ బుధవారం పేర్కొన్నారు.