కాంట్రాక్టుల పంపకాల్లో మూడు పార్టీల నేతలూ ఒక్కటే

ఆర్‌ఎస్‌ ప్రవీణ్‌కుమార్‌

చౌటుప్పల్‌గ్రామీణం, న్యూస్‌టుడే: రాష్ట్రంలో కాంట్రాక్టులు పంచుకునే విషయంలో తెరాస, భాజపా, కాంగ్రెస్‌ నాయకులు ఒక్కటవుతారని బీఎస్పీ రాష్ట్ర అధ్యక్షుడు ఆర్‌ఎస్‌ ప్రవీణ్‌కుమార్‌ ఆరోపించారు. యాదాద్రి భువనగిరి జిల్లా చౌటుప్పల్‌ మండలంలో బహుజన రాజ్యాధికార యాత్ర శనివారం మూడో రోజు కొనసాగింది. పలు గ్రామాల్లో ఆయన ప్రజలను ఉద్దేశించి మాట్లాడారు. గర్భిణులకు, పిల్లలకు పంచే పౌష్టికాహార కిట్ల పంపిణీ టెండర్లలో ప్రభుత్వం అక్రమాలకు పాల్పడి కమీషన్లు దండుకోవడం సిగ్గుచేటని విమర్శించారు. రాజగోపాల్‌రెడ్డి, తెరాస ఒక్కటేనని.. పాలమూరు-రంగారెడ్డి ప్రాజెక్టులోనూ రాజగోపాల్‌రెడ్డికి కాంట్రాక్టు దక్కిందని ఆరోపించారు. బడుగు, బలహీనవర్గాల జీవితాలు బాగుపడాలంటే బీఎస్పీ అధికారంలోకి రావాలన్నారు. యాత్రలో భాగంగా జైకేసారంలో శుక్రవారం అనారోగ్యంతో మృతిచెందిన పారిశుద్ధ్య కార్మికుడు యాదయ్య కుటుంబ సభ్యులను ఆయన పరామర్శించారు. ఎస్‌.లింగోటంలో జీతాలు, ఇతర డిమాండ్ల సాధన కోసం ప్రతిష్ఠ పెస్టిసైడ్స్‌ పరిశ్రమ కార్మికులు చేపడుతున్న సమ్మెకు మద్దతు ప్రకటించారు.