Sanjay Singh: జై షాకు బ్యాట్‌ పట్టుకోవడం తెలుసా..?: ఆప్‌ విమర్శలు

దిల్లీ: క్రికెట్‌ ఎలా ఆడాలో తెలియకుండానే భాజపా అగ్రనేత అమిత్‌ షా కుమారుడు జై షా .. బీసీసీఐలో ఉన్నతస్థానంలో ఉన్నారంటూ ఆమ్‌ఆద్మీపార్టీ (AAP) నేత సంజయ్‌ సింగ్(Sanjay Singh) విమర్శించారు. వారసత్వ రాజకీయాల గురించి కాషాయ పార్టీ చేస్తున్న విమర్శలను ఉద్దేశించి ఈవిధంగా స్పందించారు.

‘‘అమిత్‌ షా కుమారుడికి బ్యాట్‌ ఎలా పట్టుకోవాలో తెలుసా..? కానీ ఆయన ఇప్పుడు బీసీసీఐలో చక్రం తిప్పుతున్నారు. ప్రధాని మోదీ 73 ఏళ్ల వయసులో మూడోసారి ప్రధాని పీఠంపై కూర్చోవాలని ఆశిస్తున్నారు. కానీ జవాన్లకు మాత్రం వయసు పరిమితిని 21 ఏళ్లకు కుదించారు. ఈ వ్యక్తులు ఘోరమైన పరివారవాదీలు. మోదీ, అమిత్‌ షా, భాజపా నేతలకు తమ కుటుంబాలను అభివృద్ధి చేసుకోవడం మినహా మరో పని లేదు. కానీ మేం మాత్రం దేశం కోసం పని చేస్తున్నాం’’ అని సింగ్ విమర్శలు చేశారు.

జైషా ప్రస్తుతం బీసీసీఐ కార్యదర్శిగా ఉన్నారు. అలాగే సైన్యంలో అగ్నివీర్‌లుగా పని చేయాలంటే వయసు పరిమితి కనిష్ఠంగా 17 ఏళ్ల నుంచి గరిష్ఠంగా 21 ఏళ్ల లోపు ఉండాలన్న సంగతి తెలిసిందే. ఇదిలాఉంటే.. దేశంలోని ప్రతిపక్ష పార్టీలను కుటుంబ పార్టీలంటూ భాజపా పదేపదే విమర్శలు చేస్తుంటుంది. ఆతరహా రాజకీయాలు ప్రజాస్వామ్యానికే ప్రమాదకరమని ఆందోళన వ్యక్తంచేస్తుంటుంది. ఈ క్రమంలోనే సింగ్ స్పందన వచ్చింది.