దేశానికి కేసీఆర్‌ నేతృత్వం అవసరం

శాసనమండలి ఛైర్మన్‌ గుత్తా

ఈనాడు, హైదరాబాద్‌: ప్రస్తుతం దేశానికి కేసీఆర్‌ లాంటి నాయకుడి అవసరం ఉందని, ఆయన నేతృత్వాన్ని  ప్రజలు కోరుకుంటున్నారని శాసనమండలి ఛైర్మన్‌ గుత్తా సుఖేందర్‌రెడ్డి తెలిపారు. దేశంలో ప్రజాస్వామ్యం ఆయన ద్వారా వర్ధిల్లాలని కోరుకుంటున్నానన్నారు. ఆదివారం గాంధీ జయంతి సందర్భంగా శాసనసభ ప్రాంగణంలోని గాంధీ విగ్రహానికి శాసనసభాపతి పోచారం శ్రీనివాస్‌రెడ్డి, శాసనమండలి చైర్మన్‌ గుత్తా సుఖేందర్‌రెడ్డి, ప్రణాళిక సంఘం ఉపాధ్యక్షుడు బోయినపల్లి వినోద్‌కుమార్‌, పలువురు ఎమ్మెల్సీలతో కలిసి నివాళులు అర్పించారు. ఈ సందర్భంగా గుత్తా మాట్లాడుతూ.. దేశ పరిస్థితులను చూస్తుంటే గాంధీ మళ్లీ పుట్టాలనిపిస్తోందన్నారు. పోచారం మాట్లాడుతూ మహనీయుడు గాంధీ బోధనలను అంతా అనుసరించాలన్నారు. వినోద్‌కుమార్‌ మాట్లాడుతూ.. గాంధీ పథం అనుసరణీయమన్నారు. మత ఛాందసవాదుల పట్ల జనం అప్రమత్తంగా ఉండాలని సూచించారు.