YSRCP: ఇది మనందరి ఖర్మ!.. వైకాపా ప్రజాప్రతినిధుల ఆవేదన

జి.సిగడాం, న్యూస్‌టుడే: ‘గ్రామాల్లో రోడ్లు, కాలువలు నిర్మించుకుందామన్నా నిధులు లేవు. గతంలో తీర్మానించిన పనులకూ అతీగతీ లేదు. ఇలాగైతే ఈ సమావేశాలకు విలువ ఎలా ఉంటుంది? ఇది అందరు సర్పంచులు అనుభవిస్తున్న ఖర్మ.. దీనిపై తీర్మానించి అందరూ సంతకాలు పెడితే పైకి పంపిద్దాం’ అని వైకాపాకు చెందిన జడ్పీటీసీ సభ్యుడు కాయల రమణ తీవ్ర ఆవేదన వ్యక్తం చేశారు. శ్రీకాకుళం జిల్లా జి.సిగడాం మండల సర్వసభ్య సమావేశం గురువారం ఎంపీపీ మీసాల సత్యవతి అధ్యక్షతన జరిగింది. ఈ సందర్భంగా పలువురు సభ్యులు మాట్లాడారు. గతంలో తీర్మానించిన పనులూ జరగడం లేదని వాపోయారు. ప్రతినెలా సమావేశాలు నిర్వహించడమే తప్ప ప్రయోజనం లేదని అన్నారు. చాలామంది గైర్హాజరు కావడానికి ఇదే కారణమని వాపోయారు. సమావేశంలో మండల పరిషత్‌ ఉపాధ్యక్షులు పీలు సాధ్విమణి, వెంకటరమణ, సర్పంచులు, అధికారులు పాల్గొన్నారు.