Harish Rao: హామీలు అమలు చేయలేక.. మాపై విరుచుకుపడుతున్నారు: హరీశ్‌రావు

హైదరాబాద్‌: ఎన్నికల హామీలు అమలు చేయడంలో కాంగ్రెస్‌ (Congress) జాప్యం చేస్తోందని భారాస ఎమ్మెల్యే, మాజీ మంత్రి హరీశ్‌రావు(Harish Rao) అన్నారు. హామీల అమలుకు తేదీలు చెప్పింది కాంగ్రెస్‌ నేతలు కాదా? అని ప్రశ్నించారు. ఎల్బీనగర్‌లో నిర్వహించిన భారాస విస్తృతస్థాయి సమావేశంలో ఆయన మాట్లాడారు. సాగునీటి ప్రాజెక్టుల విషయంలో సీఎం రేవంత్‌రెడ్డి (Revanth Reddy) చేసిన వ్యాఖ్యాలపై స్పందించారు.

‘పోతిరెడ్డిపాడు ప్రాజెక్టు గురించి అడిగే హక్కు సీఎం రేవంత్‌రెడ్డికి లేదు. తెదేపాలో ఉన్నప్పుడు దాని గురించి ఒక్క మాట కూడా మాట్లాడలేదు. తెలంగాణకు అన్యాయం చేస్తూ రాయలసీమకు నీళ్లు తీసుకెళ్తుంటే అసెంబ్లీని స్తంభింపజేసి పోరాడింది మా పార్టీ. నాడు.. మంత్రులుగా ఉన్న నేను, నాయిని నర్సింహారెడ్డి పదవులకు రాజీనామా చేసి నిరసన తెలియజేశాం. కేఆర్‌ఎంబీకి ప్రాజెక్టుల అప్పగించేందుకు మేం అంగీకరించలేదు. రేవంత్‌ సర్కార్‌పై కేంద్రం ఒత్తిడి చేసింది. దీంతో వాళ్లే అంగీకరించారు. ప్రాజెక్టులపై అసెంబ్లీలో చర్చ జరిగితే దిమ్మతిరిగే జవాబు ఇవ్వడానికి మేం సిద్ధంగా ఉన్నాం. అసలు విభజన చట్టం బిల్లు పెట్టింది కాంగ్రెస్‌ కాదా? ఆ చట్టం తయారు చేసింది జైపాల్‌రెడ్డి, జైరామ్‌ రమేశ్‌ కాదా? తప్పు చేసి దాన్ని కప్పిపుచ్చుకునేందుకు వంద అబద్దాలు ఆడుతున్నారు. హామీలు అమలు చేయలేక మాపై విరుచుకుపడుతున్నారు. రేవంత్‌రెడ్డి విషయం లేక విషం చిమ్ముతున్నారు. ప్రస్తుతం రాష్ట్రంలో రెండు, మూడు గంటలు కరెంట్‌ పోతోంది. లోక్‌సభ ఎన్నికలు పూర్తయ్యాక కరెంటు కోతలు మరింత ఎక్కువవుతాయి. ఎన్నికల హామీలు అమలు చేశాకే ఓటు అడగాలి.’’అని హరీశ్‌రావు అన్నారు.