Punjab vs Bengaluru: పంజాబ్‌ ఔట్.. బెంగళూరు ప్లేఆఫ్స్ ఆశలు సజీవం

ధర్మశాల: ఐపీఎల్‌ 17 సీజన్‌లో బెంగళూరు వరుసగా నాలుగో విజయం సాధించింది. పంజాబ్‌తో జరిగిన మ్యాచ్‌లో ఆర్సీబీ 60 పరుగుల తేడాతో ఘన విజయం సాధించింది. తొలుత బ్యాటింగ్ చేసిన బెంగళూరు నిర్ణీత 20 ఓవర్లలో ఆ జట్టు 7 వికెట్ల నష్టానికి 241 పరుగులు చేసింది. ఈ కొండంత లక్ష్యఛేదనలో పంజాబ్ 17 ఓవర్లకు 181 పరుగులకే ఆలౌటైంది. ఈ విజయంతో బెంగళూరు ప్లేఆఫ్స్‌ అవకాశాలను సజీవంగా ఉంచుకుంది. తాజా ఓటమితో పంజాబ్ నాకౌట్ రేసు నుంచి నిష్క్రమించింది. 

పంజాబ్ బ్యాటర్లలో రిలీ రోసో (61; 27 బంతుల్లో 9 ఫోర్లు, 3 సిక్స్‌లు) మెరుపు అర్ధ శతకం బాదాడు. శశాంక్ సింగ్ (37; 19 బంతుల్లో 4 ఫోర్లు, 2 సిక్స్‌లు), జానీ బెయిర్‌స్టో (27; 16 బంతుల్లో 4 ఫోర్లు, 1 సిక్స్‌), సామ్‌ కరన్ (22; 16 బంతుల్లో 2 సిక్స్‌లు) ధాటిగా ఆడినా భారీ ఇన్నింగ్స్‌లుగా మలచలేకపోయారు. ప్రభ్‌సిమ్రన్ సింగ్ (6), జితేశ్‌ శర్మ (5), లివింగ్‌స్టోన్ (0) సింగిల్‌ డిజిట్‌ స్కోరుకే పరిమితమయ్యారు. బెంగళూరు బౌలర్లలో సిరాజ్ 3, స్వప్నిల్ సింగ్ 2, ఫెర్గూసన్ 2 వికెట్లు పడగొట్టారు. 

అంతకుముందు టాస్‌ ఓడి బ్యాటింగ్‌కు దిగిన బెంగళూరు భారీ స్కోరు చేసింది. విరాట్ కోహ్లీ (92; 47 బంతుల్లో 7 ఫోర్లు, 6 సిక్స్‌లు) సెంచరీ మిస్ చేసుకున్నాడు. ఆరంభంలో రెండుసార్లు జీవదానాలు అందుకున్న కోహ్లీ తర్వాత చెలరేగిపోయాడు. రజత్ పటిదార్‌ (55; 23 బంతుల్లో 3 ఫోర్లు, 6 సిక్స్‌లు) దంచికొట్టాడు. చివర్లో కామెరూన్ గ్రీన్ (46; 27 బంతుల్లో 5 ఫోర్లు, 1 సిక్స్) మెరుపులు మెరిపించి ఇన్నింగ్స్‌ చివరి బంతికి ఔటయ్యాడు. దినేశ్ కార్తిక్ (18; 7 బంతుల్లో 1 ఫోర్, 2 సిక్స్‌లు)  డుప్లెసిస్ (9), విల్ జాక్స్‌ (12) ఎక్కువసేపు క్రీజులో నిలవలేకపోయారు. పంజాబ్ బౌలర్ హర్షల్ పటేల్ ఇన్నింగ్స్‌ చివరి ఓవర్‌లో మూడే పరుగులు ఇచ్చి మూడు వికెట్లు పడగొట్టాడు. విధ్వత్ కావేరప్ప 2, అర్ష్‌దీప్, సామ్ కరన్‌కు తలో వికెట్ దక్కింది.