Congress: కాంగ్రెస్‌లో చేరనున్న కె.కేశవరావు, మేయర్‌ విజయలక్ష్మి

హైదరాబాద్‌: భారాస ఎంపీ కె.కేశవరావు (కేకే), ఆయన కుమార్తె.. జీహెచ్‌ఎంసీ మేయర్‌ విజయలక్ష్మి కాంగ్రెస్‌లో చేరనున్నారు. ఈ నెల 30న హస్తం పార్టీలో చేరనున్నట్లు విజయలక్ష్మి స్వయంగా ప్రకటించారు. అధికార పార్టీలో ఉంటేనే సమస్యల పరిష్కారం సులువవుతుందని పేర్కొన్నారు.

‘‘కాంగ్రెస్‌లోకి వెళ్లాలనుకుంటున్నాను. గతంలో సుదీర్ఘ కాలం ఆ పార్టీలోనే ఉన్నా. కేసీఆర్‌ నాకు చాలా గౌరవం ఇచ్చారు. నాకు కూడా ఆయనపై గౌరవం ఉంది. పార్టీ అంశాలు, కవిత అరెస్టుపై కేసీఆర్‌తో చర్చించా. కవితను అక్రమంగా అరెస్టు చేశారు’’ అని కేకే తెలిపారు. తాను మాత్రం భారాసలోనే కొనసాగుతానని కేకే కుమారుడు విప్లవ్‌ కుమార్‌ తెలిపారు. తండ్రి, సోదరి నిర్ణయాలతో తనకు సంబంధం లేదన్నారు.