Bandi Sanjay: బండి సంజయ్‌కు దిల్లీ నుంచి పిలుపొస్తుందా?

హైదరాబాద్‌: తెలంగాణ రాష్ట్ర భాజపా అధ్యక్షుడు బండి సంజయ్‌కు అధిష్ఠానం నుంచి పిలుపు వచ్చే అవకాశముందని ఆ పార్టీ వర్గాల్లో ప్రచారం జరుగుతోంది. గత కొద్దిరోజులుగా రాష్ట్ర భాజపా అధ్యక్షుడి మార్పు జరగనుందనే ఊహాగానాలు వినిపిస్తున్నాయి. ఈ క్రమంలో సంజయ్‌కు కేంద్రమంత్రి పదవి ఇచ్చే అవకాశముందనే ప్రచారం జరుగుతోంది. రాష్ట్ర అధ్యక్ష పదవికి కేంద్రమంత్రి కిషన్‌రెడ్డి పేరును పరిశీలిస్తున్నట్లు వార్తలు సోషల్‌ మీడియాలో చక్కర్లు కొడుతున్నాయి.

ఈ నేపథ్యంలో ఆదివారం హనుమకొండలో సంజయ్‌ ఆసక్తికర వ్యాఖ్యలు చేశారు. ‘‘మోదీ సభకు అధ్యక్షుడి హోదాలో వస్తానో.. లేదో తెలియదు. హైకమాండ్‌ నిర్ణయమే శిరోధార్యం. మోదీ సభను విజయవంతం చేయాలి’’  అని కార్యకర్తలతో ఆయన వ్యాఖ్యానించారు. ఈ వ్యాఖ్యలతో సంజయ్‌కు దిల్లీ నుంచి పిలుపు రావొచ్చనే ఊహాగానాలకు మరింత బలం చేకూరుతోంది.

ముంబయి వెళ్లిన సంజయ్‌

బండి సంజయ్‌ నేడు ముంబయి పర్యటనకు వెళ్లారు. అక్కడి ముంబ మహాదేవి ఆలయంలో ఆయన ప్రత్యేక పూజలు నిర్వహించనున్నారు. భాజపా అధిష్ఠానం నుంచి సాయంత్రంలోపు  సంజయ్‌కు పిలుపు రావొచ్చని ప్రచారం జరుతోంది. ఈ నేపథ్యంలో పిలుపు వస్తే సంజయ్‌ ముంబయి నుంచే నేరుగా దిల్లీ వెళ్లే అవకాశముంది.

జితేందర్‌రెడ్డిని కలవనున్న ఈటల

మరోవైపు మాజీ ఎంపీ, భాజపా నేత జితేందర్‌రెడ్డి వ్యవసాయ క్షేత్రానికి  మాజీ మంత్రి, ఎమ్మెల్యే ఈటల రాజేందర్‌ వెళ్లనున్నారు. గత కొంతకాలంగా వీరిద్దరి మధ్య విభేదాలు కొనసాగుతున్నట్లు ప్రచారం జరుగుతోంది. రాష్ట్ర అధ్యక్షుడిగా సంజయ్‌ను కొనసాగించాలని జితేందర్‌రెడ్డి వర్గం కోరుతోంది. ఈ నేపథ్యంలో ఆయన్ను కలిసేందుకు ఈటల వెళుతుండటం ఆసక్తికరంగా మారింది.