Chidambaram: చమురు ధరల తగ్గింపు.. ఉప ఎన్నికల ఉప ఉత్పత్తి

కాంగ్రెస్ సీనియర్ నేత చిదంబరం ఎద్దేవా

దిల్లీ: పెట్రోల్, డీజిల్ ధరలు తగ్గడాన్ని భాజపా నేతలు దీపావళి కానుక అంటుంటే.. కాంగ్రెస్ మాత్రం ఉపఎన్నికల ఎఫెక్ట్ అంటూ ఎద్దేవా చేస్తోంది. కాంగ్రెస్ సీనియర్ నేత చిదంబరం ‘ఇది ఉప ఎన్నికల ఉప ఉత్పత్తి’ అంటూ ట్వీట్ చేశారు. 

‘ఇటీవల జరిగిన 30 అసెంబ్లీ, మూడు లోక్‌సభ స్థానాల ఉప ఎన్నికల ఫలితమే ఈ ఉప ఉత్పత్తి. కేంద్రం పెట్రోల్, డీజిల్‌పై ఎక్సైజ్ సుంకాన్ని తగ్గించింది. అధిక సుంకాలే చమురు ధరల పెరుగుదలకు కారణమన్న మా వ్యాఖ్యలు ఇప్పుడు నిజమయ్యాయి. కేంద్రం దురాశే ఈ అధిక సుంకాలకు కారణం అవుతోంది’ అని విమర్శించారు. 

గత కొంతకాలంగా చమురు ధరల మంటలతో దేశం అల్లాడిపోతోంది. ఈ క్రమంలో నిన్న కేంద్రం పెట్రోల్‌పై రూ.5, డీజిల్‌పై రూ.10 చొప్పున ఎక్సైజ్ సుంకాన్ని తగ్గించింది. గురువారం నుంచి ఈ ధరలు అమల్లోకి వచ్చాయి. ఇటీవల జరిగిన ఉప ఎన్నికల్లో అధికారంలో ఉన్న రాష్ట్రాల్లో కూడా భాజపాకు షాక్ తగిలింది. ఆ ఫలితమే సుంకాల తగ్గింపులో కనిపించదన్న ఛలోక్తులు వినిపిస్తున్నాయి.