Tokyo Olympics: యాంటీ సెక్స్‌ బెడ్స్‌.. అవాస్తవం!

స్పష్టం చేసిన నిర్వాహకులు

టోక్యో: శృంగారం కట్టడి కోసం ఒలింపిక్స్‌ ఆటగాళ్ల గదుల్లో తక్కువ సామర్థ్యమున్న మంచాలను ఏర్పాటు చేశారంటూ వస్తున్న వార్తల్ని ఒలింపిక్స్‌ నిర్వాహకులు ఖండించారు. అట్టలతో చేసినప్పటికీ.. అవి దృఢంగానే ఉంటాయని స్పష్టం చేశారు. 200 కిలోల వరకు బరువును మోయగలవని తెలిపారు. ఆ మేరకు ముందే అన్ని రకాల సామర్థ్య పరీక్షలు నిర్వహించినట్లు పేర్కొన్నారు.

మరోవైపు అట్టలతో(కార్డ్‌బోర్డుతో) చేసిన మంచాలైనప్పటికీ.. దృఢంగా ఉన్నాయంటూ ఐర్లండ్‌కు చెందిన జిమ్నాస్టిక్స్ ఆటగాడు రిస్‌ మెక్‌క్లెనఘన్‌ తన ట్విటర్‌లో ఓ వీడియో పోస్ట్‌ చేశారు. వాటిపై ఎగురుతూ ఆ మంచాల సామర్థ్యాన్ని నిరూపించే ప్రయత్నం చేశాడు. ‘యాంటీ సెక్స్‌ బెడ్స్‌’ అంటూ వస్తున్న వార్తలన్నీ అవాస్తవమని స్పష్టం చేశారు. దీనికి ఒలింపిక్స్‌ నిర్వాహకులు..  రిస్‌కు ధన్యవాదాలు తెలిపారు.

కరోనా మహమ్మారి నేపథ్యంలో క్రీడాకారులు ఒకరితో ఒకరు కలవకుండా.. శృంగార కార్యకలాపాల్లో పాల్గొనకుండా తక్కువ సామర్థ్యమున్న మంచాలను సిద్ధం చేశారంటూ అమెరికాకు చెందిన ఓ ఆటగాడు ట్వీట్‌ చేయడంతో ‘యాంటీ సెక్స్‌ బెడ్స్‌’ అంటూ సామాజిక మాధ్యమాల్లో వైరల్‌గా మారింది. ఈ నేపథ్యంలోనే తాజాగా ఒలింపిక్స్ నిర్వాహకులు స్పందించి దీనిపై స్పష్టతనిచ్చారు.