టైటిల్‌పై భారత అమ్మాయిల గురి

దక్షిణాఫ్రికాతో ఫైనల్‌ నేడు

ఈస్ట్‌ లండన్‌: మరి కొన్ని రోజుల్లో మహిళల టీ20 ప్రపంచకప్‌ జరుగనున్న నేపథ్యంలో మెగా టోర్నీకి రెట్టించిన ఆత్మవిశ్వాసంతో వెళ్లాలనుకుంటున్న భారత్‌.. ముక్కోణపు టీ20 సిరీస్‌ టైటిల్‌పై గురిపెట్టింది. గురువారం జరిగే ఫైనల్లో ఆతిథ్య దక్షిణాఫ్రికాతో భారత్‌ అమీతుమీ తేల్చుకోనుంది. స్వదేశంలో ఆస్ట్రేలియా చేతిలో 1-4తో ఘోర పరాజయం చవిచూసిన భారత్‌.. ముక్కోణపు సిరీస్‌లో మూడు విజయాలతో గొప్పగా పుంజుకుంది. ఈ నెల 10న ప్రారంభమయ్యే టీ20 ప్రపంచకప్‌కు ముందు ముక్కోణపు సిరీస్‌ను ఘనంగా ముగించాలని భారత్‌ పట్టుదలగా ఉంది. ఈ టోర్నీ తొలి మ్యాచ్‌లో దక్షిణాఫ్రికాపై భారత్‌ విజయం సాధించింది. ఆ జట్టుతో రెండో మ్యాచ్‌ వర్షార్పణమైంది. వెస్టిండీస్‌తో రెండు మ్యాచ్‌ల్లోనూ భారత్‌ గెలుపొందింది.