Virat Kohli: వందో టెస్టు వేళ.. చూస్తామా ఆ విరాట్ను
వందో టెస్టు.. ఈ మైలురాయిని చేరుకుంటే దిగ్గజ హోదాను అందుకున్నట్లే. అయితే విరాట్ కోహ్లి ఇందులో సగం మ్యాచ్లు ఆడేసరికే దిగ్గజ ఆటగాళ్ల జాబితాలోకి చేరిపోయాడు! మామూలుగా అయితే వంద టెస్టుల మైలురాయిని అందుకోవడం విరాట్కు ఒక లాంఛనం మాత్రమే! కానీ రెండేళ్లుగా
ఈనాడు క్రీడావిభాగం
వందో టెస్టు.. ఈ మైలురాయిని చేరుకుంటే దిగ్గజ హోదాను అందుకున్నట్లే. అయితే విరాట్ కోహ్లి ఇందులో సగం మ్యాచ్లు ఆడేసరికే దిగ్గజ ఆటగాళ్ల జాబితాలోకి చేరిపోయాడు! మామూలుగా అయితే వంద టెస్టుల మైలురాయిని అందుకోవడం విరాట్కు ఒక లాంఛనం మాత్రమే! కానీ రెండేళ్లుగా తన స్థాయికి తగ్గట్లు ఆడలేక, ఒకప్పుడు మంచినీళ్ల ప్రాయంగా శతకాలు బాదిన వాడు.. సుదీర్ఘ కాలం పాటు మూడంకెల స్కోరు కోసం నిరీక్షిస్తూ, మూడు ఫార్మాట్లలో కెప్టెన్సీకి కూడా దూరమైన సమయంలో వందో టెస్టు ఆడుతుండటంతో ఈ మ్యాచ్పై అందరి దృష్టీ పడింది. మొహాలిలో విరాట్ తన మార్కు ఆట ఆడి, శతక టెస్టును చిరస్మరణీయం చేసుకోవాలన్నది అభిమానుల ఆకాంక్ష. అందుకోసం కోహ్లి ఎలా ప్రేరణ పొందుతాడన్నది ఆసక్తికరం.
తనకు తనే స్ఫూర్తి: ఫామ్ అందుకోవడానికి, శతక మోత మోగించడానికి విరాట్ ఎవరినో చూసి స్ఫూర్తి పొందాల్సిన పని లేదు. తనకు తనే స్ఫూర్తి. అతడి పట్టుదల, పోరాట తత్వం ఎలాంటిదో చెప్పడానికి వెనుదిరిగి చూస్తే ఎన్నో ఉదాహరణలున్నాయి. ముఖ్యంగా ఇంగ్లిష్ గడ్డపై అతడి విజయగాథను మించిన స్ఫూర్తి ఇంకేముంటుంది? 2014లో తొలిసారి ఇంగ్లాండ్లో పర్యటించినపుడు అండర్సన్ బృందం స్వింగ్ బంతుల్ని ఎదుర్కోలేక విరాట్ పడ్డ అవస్థ అంతా ఇంతా కాదు. అయిదు టెస్టుల్లో కలిపి 10 ఇన్నింగ్స్ల్లో కేవలం 13.4 సగటుతో 134 పరుగులు మాత్రమే చేసి తీవ్ర విమర్శలు ఎదుర్కొన్నాడు కోహ్లి. అప్పటిదాకా సచిన్ వారసుడు, నయా మాస్టర్ అన్నవాళ్లు ఈ పర్యటనలో అండర్సన్ అతడితో ఆటాడుకున్న తీరు చూసి తన టెక్నిక్పై అనుమానాలు వ్యక్తం చేశారు. ఆ తర్వాత వేరే దేశాల్లో ఎంత గొప్పగా ఆడినా.. 2014 ఇంగ్లాండ్ పర్యటన కెరీర్కు ఒక మచ్చలా ఉండిపోయింది. కానీ 2018లో ఆ దేశ పర్యటనకు వెళ్లి మొత్తం లెక్కలన్నీ సరి చేశాడు కింగ్. ఈసారి 5 టెస్టుల్లో కలిపి 10 ఇన్నింగ్స్ల్లో 59.3 సగటుతో ఏకంగా 593 పరుగులు చేశాడతను. అందులో 2 శతకాలు, 3 అర్ధశతకాలున్నాయి. 2018 పర్యటన తొలి ఇన్నింగ్స్లోనే 149 పరుగులతో అండర్సన్ బృందానికి అతను సమాధానం చెప్పిన తీరును అభిమానులెవరూ అంత సులువుగా మరిచిపోలేరు. ఇలా వివిధ దేశాల్లో కఠిన పరిస్థితుల్లో మేటి బౌలింగ్ దళాల్ని కోహ్లి ఎంతో గొప్పగా ఎదుర్కొన్నాడు? 2014లో ఇంగ్లిష్ గడ్డపై పేలవ ప్రదర్శన చేశాక.. కొన్ని నెలల్లో ఆస్ట్రేలియాకు వెళ్లి విరాట్ చెలరేగిన వైనం అసాధారణం. ధోని గైర్హాజరీలో తాత్కాలికంగా ఓ మ్యాచ్కు సారథ్యం అప్పగిస్తే.. రెండు ఇన్నింగ్స్ల్లోనూ శతకాల మోత మోగించి, ఓటమికి వెరవకుండా జట్టు డ్రా కోసం కాకుండా గెలుపు కోసం ఆడేలా ప్రేరేపించి, అద్భుత శతకంతో సహచరులను ముందుండి నడిపించి.. కంగారూలకు చెమటలు పట్టించాడు విరాట్. ఆ మ్యాచ్లో భారత్ త్రుటిలో ఓడినా.. బ్యాట్స్మెన్గా అతడి నైపుణ్యం, కెప్టెన్గా అతడి తెగువ ప్రశంసలందుకున్నాయి. అవి చూసే ధోని ఆలస్యం చేయకుండా సిరీస్ మధ్యలోనే అతడికి టెస్టు పగ్గాలు అప్పగించేసి తప్పుకున్నాడు. ఈ సిరీస్లో కోహ్లి 4 టెస్టుల్లో 4 శతకాలు సహా 86.5 సగటుతో 692 పరుగులు చేయడం విశేషం. సిరీస్ ప్రదర్శనలే కాదు.. ఒక్కొక్కటిగా చెప్పుకుంటూ పోతే కోహ్లి మేటి ఇన్నింగ్స్ల జాబితా పెద్దదే. 2012లో అడిలైడ్ టెస్టు సందర్భంగా సచిన్ సహా ప్రధాన బ్యాట్స్మెన్ అంతా విఫలమైన స్థితిలో మేటి ఆస్ట్రేలియా పేస్ దళాన్ని ఎదుర్కొంటూ సాధించిన తొలి సెంచరీ (118).. 2013లో సచిన్ రిటైరయ్యాక తొలిసారి అతనాడే నాలుగో స్థానంలో బ్యాటింగ్కు దిగి స్టెయిన్ దళాన్ని సమర్థంగా ఎదుర్కొంటూ దక్షిణాఫ్రికాపై సాధించిన శతకం (119).. ఆ దేశంలో 2018లో సఫారీ పేసర్లు నిప్పులు చెరిగిన సెంచూరియన్ టెస్టుల్లో జట్టు మొత్తం కలిపి 307 పరుగులు చేస్తే అందులో సగం పరుగులతో తన స్థాయిని చాటిన 153 పరుగుల ఇన్నింగ్స్.. ఇలా చెప్పుకుంటూ పోతే విరాట్ టెస్టు కెరీర్లో ఆణిముత్యాలు ఎన్నో! మరి తన మేటి ఇన్నింగ్స్లే స్ఫూర్తిగా.. తన నుంచి తనే ప్రేరణ పొంది ఒకప్పటి విరాట్ అభిమానుల ముందుకొస్తాడేమో చూడాలి.
రెండేళ్లకు పైగా ఏ ఫార్మాట్లోనూ సెంచరీ లేదు. ఇప్పుడు మూడు ఫార్మాట్లలోనూ కెప్టెనూ కాడు. బ్యాటింగ్లో ఊపు తగ్గింది. ఆటలో ఆత్మవిశ్వాసం, మైదానంలో ఉత్సాహం ఒకప్పటి స్థాయిలో లేవు!
వందో టెస్టు మైలురాయి ముంగిట విరాట్ కోహ్లి ఇలాంటి స్థితిలో ఉంటాడని ఎవరైనా ఊహించారా?
కానీ ఎంతటి ఆటగాడికైనా కెరీర్లో ఒడుదొడుకులు సహజం. అందుకు విరాట్ కూడా మినహాయింపు కాదని రుజువైంది!
అయితే ఇప్పుడు స్థాయికి తగ్గ ప్రదర్శన చేయట్లేదని విరాట్ను తక్కువ చేయగలమా? అతడు సాధించిన ఎన్నో ఘనతల గొప్పదనం తగ్గిపోతుందా?
పడి లేవడం, పోయిన చోటే వెతుక్కోవడం, విమర్శకులకు దీటైన సమాధానం చెప్పడం విరాట్కు కొత్తేమీ కాదు. కెరీర్లో ఎన్నోసార్లు చేసిందే. ఒకప్పటి విరాట్ను బయటికి తేవడానికి, పూర్వవైభవం అందుకోవడానికి, తనేంటో అందరికీ చాటిచెప్పడానికి వందో టెస్టును మించిన వేదిక మరేముంటుంది? మరి మొహాలిలో పాత విరాట్ దర్శనం చూస్తామా?
వంద టెస్టుల క్లబ్లోకి కోహ్లికి స్వాగతం. భారత క్రికెట్లో కొద్దిమంది మాత్రమే ఆ ఘనత సాధించారు. అదో అద్భుత మైలురాయి. విరాట్ గొప్ప ఆటగాడు. అందుకు పూర్తి అర్హుడు. కోహ్లిటెక్నిక్, సానుకూల దృక్పథం, ఫుట్వర్క్ను ఎంతగానో ఇష్టపడతా. 2014లో పేలవ ఫేమ్ నుంచి విరాట్ బయటపడిన తీరు అద్భుతం.
- సౌరభ్ గంగూలీ, బీసీసీఐ అధ్యక్షుడు
ఇన్నేళ్లు నీ (కోహ్లి) క్రికెట్ చూడడం ఓ గొప్ప అనుభూతి. గణాంకాల పాత్ర గణాంకాలకు ఉంటుంది. కానీ ఓ తరం మొత్తానికి ప్రేరణ ఇవ్వగలగడమే నీ నిజమైన బలం. భారత క్రికెట్కు నువ్వు చేసిన గొప్ప సేవ అదే. నా దృష్టిలో అదే నీ నిజమైన విజయం.
- సచిన్ తెందుల్కర్
71
అంతర్జాతీయ క్రికెట్లో 100 టెస్టుల మైలురాయి చేరుకున్న 71వ ఆటగాడిగా కోహ్లి నిలవనున్నాడు. 11 మంది భారత ఆటగాళ్లు ఇప్పటికే ఈ ఘనత అందుకున్నారు.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
తాజా వార్తలు (Latest News)
-
శ్రీలీల సమ్మర్ షో.. అరియానా హాట్ ‘గ్లో’
-
భాజపా నేతను చెప్పుతో కొట్టిన డిప్యూటీ సీఎం.. అనకాపల్లిలో వైకాపా అరాచకం
-
సందేశ్ఖాలీ ఘటనలు.. భాజపా ముందస్తు కుట్రే: మమతా బెనర్జీ
-
జై షాకు బ్యాట్ పట్టుకోవడం తెలుసా..?: ఆప్ విమర్శలు
-
నేను చేసిన కర్మల ఫలితమే: స్పామ్ కాల్స్పై జిరోదా సీఈవో పోస్ట్
-
మహీభాయ్ ఇంకా ఆడాలి... క్రికెట్లో నాకు తండ్రిలాంటివారు: పతిరన