David Warner: పంత్‌ నుంచి ఆ షాట్లు నేర్చుకుంటా: వార్నర్‌

ముంబయి: దిల్లీ కెప్టెన్‌ రిషబ్‌ పంత్‌ నుంచి ఒక్క చేత్తో షాట్లు ఆడడం ఎలాగో నేర్చుకుంటానని అంటున్నాడు డేవిడ్‌ వార్నర్‌. 2009లో దిల్లీతోనే భారత్‌లో టీ20 క్రికెట్‌ లీగ్‌ కెరీర్‌ను ఆరంభించిన అతడు.. మధ్యలో హైదరాబాద్‌కు ఆడి, ఈ సంవత్సరమే ఆ జట్టులోకి తిరిగొచ్చిన సంగతి తెలిసిందే. గురువారం గుజరాత్‌తో మ్యాచ్‌ నుంచి అతడు జట్టుకు అందుబాటులో ఉంటాడు. ‘‘రిషబ్‌ పంత్‌ నుంచి ఒంటి చేత్తో ఎలా షాట్లు ఆడాలో నేర్చుకోవాలనుకుంటున్నా. అతడు కుర్రాడు. ఇప్పుడిప్పుడే నాయకత్వాన్ని వంటబట్టించుకుంటున్నాడు. పంత్‌ భారత జట్టులో అంతర్భాగం కూడా. అతడితో కలిసి బ్యాటింగ్‌ చేయడానికి ఉత్సాహంగా ఎదురుచూస్తున్నా’’ అని వార్నర్‌ ఓ ప్రకటనలో చెప్పాడు. దిల్లీ ప్రధాన కోచ్‌ రికీ పాంటింగ్‌తో కలిసి పని చేయడంపైనా అతడు మాట్లాడాడు. ‘‘దిల్లీ కోచ్‌గా రికీ బాగానే విజయవంతమయ్యాడు. కెప్టెన్‌గా అతడు ఆస్ట్రేలియాను గొప్పగా నడిపించాడు. ఇప్పుడు కోచ్‌గా కూడా చాలా గౌరవాన్ని పొందుతున్నాడు. అతడితో కలిసి పని చేయడం కోసం ఎదురుచూస్తున్నా’’ అని వార్నర్‌ చెప్పాడు.