Rahul Dravid: అప్టన్‌తో చాలా ప్రయోజనం: ద్రవిడ్‌

పోర్ట్‌ ఆఫ్‌ స్పెయిన్‌: ప్యాడీ అప్టన్‌ విజ్ఞాన గని అని, క్రికెటర్ల మానసిక ఆరోగ్యం చాలా ముఖ్యమైన పరిస్థితుల్లో అతడెంతో ఉపయోగపడతాడని టీమ్‌ ఇండియా కోచ్‌ రాహుల్‌ ద్రవిడ్‌ అన్నాడు. ‘‘చాలా క్రికెట్‌ ఆడుతున్న ఈ రోజుల్లో మానసిక ఆరోగ్యంపై దృష్టిపెట్టడం చాలా ముఖ్యం. అప్టన్‌ వంటి పరిజ్ఞానమున్న వ్యక్తి జట్టుతో ఉండడం భారత జట్టుకు చాలా ఉపయోగపడుతుంది. అతడు మెంటల్‌ కండిషనింగ్‌ కోచ్‌ జట్టుతో చేరడం మా అదృష్టం. 2011లో భారత జట్టులో కలిసి పనిచేసిన అనుభవం అతడి ఉంది. అన్నింటికన్నా ముఖ్యంగా ఐపీఎల్‌లో, టీమ్‌ఇండియా తరఫున పని చేసిన అతడికి చాలా మంది భారత క్రికెటర్లపై అవగాహన ఉంది. మన సంప్రదాయం కూడా అప్టన్‌కు బాగా తెలుసు. భారత జట్టు ఎలా పనిచేస్తుందో తెలుసు. మెంటల్‌ కండిషనింగ్‌ కోచ్‌గా సరిగ్గా సరిపోతాడు. టీ20 ప్రపంచకప్‌కు జట్టును సిద్ధం చేయాలనుకుంటున్న మేం అతడి జ్ఞానాన్ని ఉపయోగించుకోవాలి’’ అని ద్రవిడ్‌ చెప్పాడు.