పుజారా 79 బంతుల్లో 107

దిల్లీ: చెతేశ్వర్‌ పుజారా.. ఈ పేరు వింటే అతడి నెమ్మదైన బ్యాటింగే గుర్తుకొస్తుంది. క్రీజులో గంటల తరబడి పాతుకుపోయే ఆ టెస్టు స్పెషలిస్టే జ్ఞాపకమొస్తాడు! అలాంటి పుజారా విధ్వంసక ఇన్నింగ్స్‌ ఆడాడు. లండన్‌ వన్డే కప్‌లో భాగంగా ససెక్స్‌కు ప్రాతినిధ్యం వహిస్తూ వార్విక్‌షైర్‌పై 311 పరుగుల ఛేదనలో ఈ కుడి చేతి వాటం బ్యాటర్‌ మెరుపు శతకం బాదాడు. చెలరేగి ఆడిన అతడు 79 బంతుల్లోనే 107 పరుగులు చేశాడు ఇందులో ఏడు ఫోర్లు, రెండు సిక్స్‌లు ఉన్నాయి. పేసర్‌ లిమ్‌ వేసిన 45వ ఓవర్లో పుజారా 3 ఫోర్లు, ఒక సిక్స్‌తో 22 పరుగులు రాబట్టడం విశేషం. 49వ ఓవర్‌ తొలి బంతికి పుజారా ఔట్‌ కావడంతో.. చివరికి ససెక్స్‌ 7 వికెట్లకు 306 పరుగులే చేసింది. వార్విక్‌షైర్‌ తరఫున ఆడిన భారత ఆఫ్‌ స్పిన్నర్‌ కృనాల్‌ పాండ్య (3/51) విజయంలో కీలకపాత్ర పోషించాడు. అంతకుముందు వార్విక్‌షైర్‌ ఇన్నింగ్స్‌లో రాబర్ట్‌ యాట్స్‌ (114) సెంచరీ చేయగా.. విల్‌ రోడ్స్‌ (76), బర్జెస్‌ (58) రాణించి జట్టుకు మెరుగైన స్కోరు అందించారు.