వెబ్‌క్యామే స్కానర్‌

డెస్క్‌టాప్‌ ఉంది గానీ స్కానర్‌ లేదా? పోనీ వెబ్‌క్యామ్‌ అయినా ఉందా? అయితే దీన్నే స్కానర్‌లా వాడుకుంటే సరి. మ్యాక్‌లోనైతే- ఫొటో బూత్‌ను ఓపెన్‌ చేసి, డాక్యుమెంట్‌ను వెబ్‌క్యామ్‌ ముందుకు తీసుకురావాలి. ఎర్రగా కనిపించే ఫొటో గుర్తును నొక్కాలి. ఇది తెరకు కింద కుడి వైపున కనిపిస్తుంది. ఈ ఫైలును డెస్క్‌టాప్‌ మీదికి డ్రాగ్‌ చేస్తే అక్కడే ఉండిపోతుంది. పీసీలోనైతే- కెమెరా యాప్‌ను ఓపెన్‌ చేసి డాక్యుమెంట్‌ను దానికి చూపించాలి. తెల్లగా కనిపించే కెమెరా గుర్తును క్లిక్‌ చేయాలి. ఫొటో తెర మీద పాపప్‌ అవుతుంది. పైన కుడి మూలన కనిపించే మూడు చుక్కల మీద క్లిక్‌ చేసి, ఓపెన్‌ ఫోల్డర్‌ను ఎంచుకోవాలి. అంతే.. స్కానింగ్‌ పూర్తవుతుంది.