ఐఎస్‌ఎస్‌ను చూస్తారా?

ఆకాశంలో అంతర్జాతీయ అంతరిక్ష కేంద్రాన్ని (ఐఎస్‌ఎస్‌) చూడాలని అనుకుంటున్నారా? ఒకవేళ చూడాలనుకున్నా అది ఎక్కడుందో మాకెలా తెలుస్తుందని పెదవి విరుస్తున్నారా? అయితే స్పేస్‌ స్టేషన్‌ యాప్‌ సాయం తీసుకోండి. అమెరికా అంతరిక్ష పరిశోధన సంస్థ నాసా ఇటీవలే దీన్ని విడుదల చేసింది. తమ స్పేస్‌ స్టేషన్‌ వెబ్‌సైట్‌ ఆధారంగా ఈ యాప్‌ను రూపొందించింది. ఆకాశంలో అతి ప్రకాశవంతంగా కనిపించే మూడో వస్తువు అంతర్జాతీయ అంతరిక్ష కేంద్రమే. ఎప్పుడు, ఎక్కుడుందో తెలిస్తే తేలికగానే గుర్తించొచ్చు. టెలిస్కోప్‌ల వంటి సాధనాలేవీ లేకుండా మామూలుగానే చూడొచ్చు. ఇది వేగంగా కదులుతున్న విమానంలా కనిపిస్తుంది. కాకపోతే చాలా ఎత్తులో, గంటకు 17,500 మైళ్ల వేగంతో ప్రయాణిస్తుంటుంది. స్పేస్‌ స్టేషన్‌ యాప్‌ ద్వారా ఐఎస్‌ఎస్‌ లొకేషన్‌ను 2డీ, 3డీలో చూడొచ్చు. ఫొటోలు, వీడియోలు తీసి షేర్‌ చేసుకోవచ్చు. తెల్లవారుజామున, సాయంత్రం వేళల్లో దీనిపై సూర్యరశ్మి బాగా ప్రసరిస్తుంది. అందువల్ల ఈ సమయాల్లో ఐఎస్‌ఎస్‌ మరింత స్పష్టంగా కనిపిస్తుంది. ఆయా ప్రాంతాల్లో ఎప్పుడు ప్రకాశవంతంగా కనిపిస్తుందో యాప్‌ ద్వారా తెలుసుకోవచ్చు. సరిగ్గా అప్పుడు ఆకాశంలోకి చూస్తే ఐఎస్‌ఎస్‌ కనిపిస్తుంది.