Whatsapp: వాట్సప్‌ ప్రపంచంలో జాగ్రత్త!

ఇటీవల స్పామ్‌ కాల్స్‌, మెసేజ్‌లు వాట్సప్‌లో పెద్ద సమస్యగా మారాయి. ఎంతోమంది మోసాల బారిన పడుతున్నారు. డబ్బులూ పోగొట్టుకుంటున్నారు. ఈ మధ్య గురుగ్రామ్‌లోని ఒక సాఫ్ట్‌వేర్‌ ఇంజినీర్‌ ఇలాగే మోసగాళ్ల వలలో చిక్కి, రూ.42 లక్షలు పోగొట్టు కోవటం సంచలనం సృష్టించింది. సైబర్‌ నేరగాళ్లు వాట్సప్‌ ద్వారా అతడిని సంప్రదించి, పార్ట్‌-టైమ్‌ ఉద్యోగం ఇస్తామని ఆశ పెట్టారు. కొన్ని సామాజిక మాధ్యమాల్లో చేరాలని సూచించారు. టెక్నాలజీ గురించి బాగా తెలిసి ఉన్నప్పటికీ ఆ ఇంజినీరు నేరగాళ్ల మాయలో పడి డబ్బులు కోల్పోవటం గమనార్హం. ఇలాంటి సమస్యలను పరిష్కరించ టానికి వాట్సప్‌ ప్రయత్నిస్తోంది. అయినా కూడా మన జాగ్రత్తలో మనం ఉండటం మంచిది.

* రెండంచెల (టూ స్టెప్‌) ధ్రువీకరణను యాక్టివేట్‌ చేసుకోవాలి. ఇది వాట్సప్‌ ఖాతా సురక్షితంగా ఉండేందుకు ఎంతగానో తోడ్పడుతుంది. ఖాతా రీసెటింగ్‌, వెరిఫై చేస్తున్నప్పుడు ఆరు అంకెల పిన్‌ నంబరును అడుగుతుంది. ఇతరులు మన ఖాతాలోకి చొరబడకుండా కాపాడుతుంది.

* తెలియనివారి నుంచి వచ్చే మెసేజ్‌ల విషయంలో అప్రమత్తంగా ఉండాలి. అనుచిత సమాచారాన్ని కోరినా, విచిత్రమైన అభ్యర్థనలు చేసినా అనుమానించాలి. ఇలాంటి మెసేజ్‌లకు స్పందించొద్దు. నేరుగా ఆ వ్యక్తులకు లేదా సంస్థలకు ఫోన్‌ చేసి ధ్రువీకరించుకోవాలి. వ్యక్తిగత సమాచారాన్ని ఎన్నడూ వారికి ఇవ్వద్దు. డబ్బులు పంపొద్దు.

* అజ్ఞాత వ్యక్తుల నుంచి వచ్చే కాల్స్‌కు జవాబు ఇవ్వద్దు. ఇలాంటి కాల్స్‌ను వెంటనే బ్లాక్‌ చేయాలి. అనుమానిత ఖాతాల గురించి రిపోర్టు చేయాలి.

* అనుమానిత గ్రూప్‌ ఛాట్‌లో ఉన్నట్టు అనిపిస్తే వెంటనే దానిలోంచి బయటకు వచ్చేయాలి. దాని మీద ఫిర్యాదు (రిపోర్టు) చేయాలి.

* ప్రొఫైల్‌ ఫొటో, ఆన్‌లైన్‌ స్టేటస్‌ వంటి వివరాలను ఎవరెవరు చూడొచ్చనేది మనమే నిర్ణయించుకోవచ్చు. సెటింగ్స్‌లోని ప్రైవసీ విభాగం ద్వారా దీన్ని ఎంచుకోవచ్చు. ఆన్‌లైన్‌ స్టేటస్‌ను చూసేవారిని పరిమితం చేసుకుంటే భద్రతా పెరుగుతుంది. నమ్మకమైన కాంటాక్టులతోనే వ్యక్తిగత వివరాలను పంచుకోవాలి.

* వాట్సప్‌ ఖాతాకు అనుసంధానమైన పరికరాలను తరచూ సమీక్షించుకోవటం మంచిది. ఏదైనా తెలియని పరికరం కనిపిస్తే వెంటనే దాన్నుంచి లాగ్‌ అవుట్‌ కావాలి.

* అనుమానిత టెక్స్ట్‌, అభ్యర్థనలు అందినప్పుడు ఆచితూచి వ్యవహరించాలి. అవి నిజమో, కాదో తెలుసుకోవాలి. ధ్రువీకృతం కాని లింక్‌లను క్లిక్‌ చేయొద్దు. చిరునామా, ఫోన్‌ నంబరు, పాస్‌వర్డ్‌లు, క్రెడిట్‌/డెబిట్‌ కార్డు నంబరు, బ్యాంకు ఖాతా సమాచారం వంటి రహస్య వివరాలను ఎట్టి పరిస్థితుల్లోనూ పంచుకోవద్దు.