ఇంటాక్‌ క్విజ్‌ పోటీల్లో మెరిసిన కోదాడ విద్యార్థులు

కోదాడ పట్టణం, చార్మినార్‌, న్యూస్‌టుడే: రాష్ట్ర స్థాయిలో శుక్రవారం హైదరాబాద్‌లోని సాలార్‌జంగ్‌ వస్తు సంగ్రహాలయం (మ్యూజియం)లో నిర్వహించిన ఇంటాక్‌ హెరిటేజ్‌ క్విజ్‌-2022 తుది పోటీల్లో సూర్యాపేట జిల్లా కోదాడ తేజ విద్యాలయ విద్యార్థులు విజేతలుగా నిలిచారు. 8, 9, 10వ తరగతుల విద్యార్థులకు భారతీయ కళలు, చరిత్ర, సంస్కృతిపై అవగాహన కల్పించడానికి ఈ పోటీలు ఏటా దేశవ్యాప్తంగా నిర్వహిస్తారు. వీటిని ఇండియన్‌ నేషనల్‌ ట్రస్ట్‌ఫర్‌ ఆర్ట్స్‌ అండ్‌ కల్చరల్‌ హెరిటేజ్‌ ఆధ్వర్యంలో నిర్వహిస్తారు. వందకుపైగా పాఠశాలలు పాల్గొన్న ఈ పోటీల్లో కోదాడ తేజవిద్యాలయ పదోతరగతి విద్యార్థులు తిప్పన అభిరామిరెడ్డి, రావులపెంట జశ్వంత్‌ విజేతలుగా నిలిచారు. హైదరాబాద్‌ గీతాంజలి దేవశాల విద్యార్థులు ద్వితీయ స్ధానం సాధించారు. వీరికి ఇంటాక్ట్‌ రాష్ట్ర కన్వీనర్‌ అనురాధారెడ్డి, సాలార్‌జంగ్‌ మ్యూజియం డైరెక్టర్‌ నాగేందర్‌రెడ్డి జ్ఞాపికలు అందించారు.